Mbi 355 kilogramë narkotikë të konfiskuar janë shkatërruar sot në Prizren nën mbikëqyrjen nga Prokuroria, Gjykata dhe Policia.
Me autorizim të ushtruesit të Detyrës së Kryeprokurorit të Shtetit, kryeprokurori i Prokurorisë Themelore në Prizren, Petrit Kryeziu, ka marrë pjesë sot në procesin e shkatërrimit të një sasie të konsiderueshme të substancave narkotike, të konfiskuara dhe sekuestruara në raste të ndryshme penale.
Prokuroria Themelore në Prizren ka njoftuar se shkatërrimi është kryer nga komisioni kompetent, i përbërë nga përfaqësues të Prokurorisë, Gjykatës dhe Policisë së Kosovës, në përputhje të plotë me procedurat standarde të veprimit.
“Gjatë këtij procesi janë shkatërruar: 347 kg e 804.79 g marihuanë, 886.89 g kokainë, 7 kg e 788.7 g heroinë, 8 bimë kanabis, 100 kg + 37.7 g fara kanabisi, 155.7 g kërpudha narkotike, 160 euro monedha letre, 3 valixhe”, thuhet në njoftim.
Prokuroria ka njoftuar se, procesi është zhvilluar në një ambient të licencuar, duke respektuar standardet ligjore dhe praktikat e sigurisë, ndërsa ky aktivitet është mbështetur nga Home Affairs Programme of the European Union in Kosovo (HAPE), i financuar nga Bashkimi Evropian.
Tutje theksohet se Prokuroria e Shtetit mbetet e përkushtuar në luftimin e të gjitha formave të kriminalitetit dhe në garantimin e sigurisë publike.
