Prokuroria Speciale e Kosovës njofton se ka dorëzuar dy aktakuza në Gjykatën Themelore në Prishtinë ndaj tre personave, të akuzuar për veprën penale “Nxitja e përçarjes dhe mosdurimit”.
Në aktakuzën e parë, i pandehuri I.U. akuzohet se nga viti 2021 deri më 23 tetor 2024 ka shpërndarë përmbajtje nacionaliste përmes rrjetit social “Facebook”. Gjatë kontrollit policor më 23 tetor 2024, në veturën e tij janë gjetur dhe sekuestruar katër çanta me materiale të ndryshme, përfshirë fanella dhe 148 kartëvizita me përmbajtje nxitëse dhe përçarese, që mund të kishin shkaktuar prishje të rendit publik.
Në aktakuzën e dytë, të pandehurit K.B. dhe M.J. akuzohen se gjatë vitit 2020, përmes rrjetit social “Facebook”, kanë publikuar një video në parkun e qytetit në Gjakovë, me qëllim nxitjen e përçarjes mes grupeve kombëtare dhe etnike.
Prokuroria Speciale ka kërkuar nga Gjykata Themelore në Prishtinë që të shpallë fajtorë të pandehurit dhe t’i dënojë sipas ligjeve në fuqi.
