Kryetari i Prishtinës, Përparim Rama, ka njoftuar se Komuna ka dorëzuar sot një kërkesë urgjente në Gjykatën Kushtetuese, pasi Ministria e Financave ka bllokuar buxhetin e Kryeqytetit – një vendim që Rama e ka cilësuar si arbitrar dhe të paprecedentë.
Sipas kryetarit Rama, ky bllokim po rrezikon funksionimin e shërbimeve thelbësore për qytetarët e Prishtinës, nga pastërtia dhe siguria sociale, te mirëmbajtja e infrastrukturës dhe pagesat për punonjësit e komunës dhe kompanitë kontraktuese.
Rama e ka quajtur këtë veprim “goditje politike ndaj Kryeqytetit dhe vetë qytetarëve”, duke theksuar se një qasje e tillë është e papranueshme dhe dëmton drejtpërdrejt jetën e përditshme të banorëve të Prishtinës.
Për këtë arsye, ai ka kërkuar ndërhyrjen e Gjykatës Kushtetuese, me qëllim mbrojtjen e ligjit, pavarësisë institucionale të komunave, të drejtave të qytetarëve dhe funksionimit normal të Kryeqytetit.
Kryetari Rama ka bërë thirrje për një vendim të shpejtë dhe të drejtë, që do të lejojë zbatimin e ligjit dhe rikthimin e stabilitetit financiar në Prishtinë, duke theksuar se qytetit i duhen zgjidhje, e jo pengesa.
