Shefja e Misionit të Republikës së Kosovës në Izrael, Ines Demiri, ka zhvilluar një vizitë zyrtare në dy institucione të arsimit të lartë në Izrael, në kuadër të përpjekjeve për zgjerimin dhe forcimin e bashkëpunimit ndëruniversitar.
Gjatë vizitës së saj në Universitetin Ben Gurion, Ines Demiri u prit nga zëvendëspresidenti, Dan Blumberg, ku u diskutua për zhvillimin e programeve akademike në të gjitha nivelet, bachelor, master dhe doktoratë, si dhe për nismat e bashkëpunimit kërkimor ndërinstitucional.
Në një postim në Facebook, Demiri njofton se një vizitë tjetër u realizua në Universitetin Ariel, ku Ambasadorja u prit nga Dekani, Prof. Albert Pinhasov. Bisedimet u fokusuan në krijimin e partneriteteve të reja akademike, zhvillimin e programeve të përbashkëta studimore dhe nxitjen e shkëmbimeve studentore dhe akademike.
Pjesë e rëndësishme e vizitës ishte takimi me studentë të shkencave politike dhe marrëdhënieve diplomatike, ku Ambasadorja diskutoi për historinë e Kosovës, procesin e shtetndërtimit, vizionin për të ardhmen dhe marrëdhëniet e shkëlqyera miqësore ndërmjet Kosovës dhe Izraelit.
Kjo vizitë nënvizon angazhimin e Kosovës për të forcuar lidhjet akademike ndërkombëtare dhe për të krijuar mundësi të reja për studentët dhe institucionet e arsimit të lartë.
