Kryetari i Sindikatës së Policisë së Kosovës, Avdi Hoti, është nderuar me medalje nderi gjatë një ceremonie të mbajtur në Varshavë, Poloni, me rastin e shënimit të 35-vjetorit të Sindikatës së Pavarur Vetëqeverisëse të Policisë së Polonisë (NSZZ Policjantów).
Me ftesë të sindikatës polake, Hoti mori pjesë në ceremoninë solemne, ku morën pjesë përfaqësues nga vendet e rajonit dhe më gjerë. Ky aktivitet vlerësohet si një kontribut i rëndësishëm për jetën sindikale dhe një hap konkret drejt forcimit të marrëdhënieve ndërmjet sindikatave ndërkombëtare.
Sindikata e Policisë së Kosovës, përmes një postimi në Facebook, njofton se gjatë ceremonisë, presidenti i Sindikatës së Pavarur Vetëqeverisëse të Policisë së Polonisë, Rafal Jankowski, i dorëzoi kryetarit Hoti medaljen në shenjë mirënjohjeje për bashkëpunimin e ndërsjellë.
Kryetari Hoti theksoi se takimet e tilla krijojnë ura të reja komunikimi dhe nxisin bashkëpunimin ndër-sindikal. Ai shtoi se këto aktivitete janë të rëndësishme për shkëmbimin e përvojave, përforcimin e dialogut social dhe përfaqësimin dinjitoz të interesave të anëtarëve.
Sindikata e Policisë së Kosovës dhe sindikatat pjesëmarrëse u shprehën të përkushtuara për thellimin e bashkëpunimit në të gjitha fushat me interes të përbashkët dhe forcimin e lidhjeve ndërinstitucionale.
