Përpara seancës së nesërme të Kuvendit të Kosovës, ku në rend dite është çështja e buxhetit të Radio Televizionit të Kosovës (RTK), dy sindikatat e institucionit, Sindikata e Pavarur e RTK-së dhe Shoqata Sindikale e Radio Kosovës, i janë drejtuar deputetëve me letra të hapura, duke kërkuar zgjidhje të menjëhershme për gjendjen e krijuar në transmetuesin publik.
Në letrat e tyre, të dy sindikatat theksojnë se kjo çështje tejkalon çdo debat të përditshëm politik, duke qenë se prek drejtpërdrejt funksionimin e RTK-së dhe mirëqenien e mbi 700 punëtorëve.
Sipas tyre, punëtorët e RTK-së nuk kanë marrë pagën e muajit tetor tash e tre javë, duke e përshkruar situatën si të rëndë dhe shqetësuese, me ndikim të madh social dhe institucional. Sindikatat paralajmërojnë se vonesat e tilla po e rrezikojnë stabilitetin e punës, funksionimin e përditshëm të mediumit publik dhe misionin e tij themelor.
“RTK është institucion i pavarur, i krijuar nga Kuvendi i Kosovës për t’i shërbyer publikut, për të siguruar informim të drejtë, profesional dhe të balancuar. Pa një zgjidhje të qëndrueshme buxhetore, rrezikohet misioni i tij dhe pavarësia editoriale”, thuhet në letrat drejtuar deputetëve.
Të dy organizatat sindikale u bëjnë thirrje deputetëve që gjatë seancës së nesërme të reflektojnë me maturi, seriozitet dhe përgjegjësi, në mënyrë që të krijohen kushtet për pagesën e pagave për rreth 700 punëtorët, si dhe të sigurohet buxheti i nevojshëm për funksionimin normal të transmetuesit publik.
“Pavarësisht bindjeve apo vijave partiake, çështja e transmetuesit publik është përgjegjësi e përbashkët institucionale”, përfundojnë sindikatat në thirrjen e tyre drejtuar Kuvendit të Republikës së Kosovës.
