Dy fshatra rumune u evakuuan të hënën pasi një dron goditi një tanker me flamur turk dhe shkaktoi një zjarr në jug të Ukrainës, pranë kufirit me Rumaninë.
Anija cisternë MT Orinda u sulmua ndërsa po shkarkonte gaz të lëngshëm nafte në portin e Izmail, në rajonin e Odessa-s. Në atë kohë në bord ndodheshin më shumë se një duzinë punëtorësh dhe të 16 anëtarët e ekuipazhit u shpëtuan pa lëndime, konfirmoi Drejtoria Detare Turke, raporton Independent .
Infrastrukturë e dëmtuar e energjisë
Sipas kreut të administratës ushtarake rajonale të Odesës, Oleh Kiper, sulmi dëmtoi infrastrukturën energjetike dhe portuale në disa qytete, shkaktoi zjarre të shumta dhe dëmtoi disa anije civile. “Një person u plagos”, tha Kiper.Incidenti ndodhi vetëm një ditë pasi Presidenti ukrainas Volodymyr Zelensky nënshkroi një marrëveshje për të importuar burime energjie përmes zonës që tani është nën sulm. Po atë ditë, Zelensky u takua me Emmanuel Macron në Pallatin Elysee, ku të dy udhëheqësit njoftuan dorëzimin e 100 avionëve luftarakë Rafale në Kiev.
