Pas ndërprerjes së reshjeve të dendura të shiut, situata në Komunën e Gjilanit është stabilizuar dhe niveli i ujit ka rënë dukshëm. Të martën, sipas zyrtarëve komunalë, reshjet shkaktuan vështirësi në qarkullimin e qytetarëve dhe automjeteve në disa zona të komunës.
Kryetari i Gjilanit, Alban Hyseni, bashkë me drejtorët komunalë dhe ekipet e emergjencës, ishin në terren gjatë gjithë ditës duke monitoruar dhe ndërhyrë aty ku ishte e nevojshme.
Hyseni u bëri thirrje qytetarëve të lëvizin vetëm në raste emergjente dhe të shmangin rrugët ku ka rrezik nga ngritja e nivelit të ujit, si Malishevë–Gjilan, Livoçi i Poshtëm dhe i Epërm, rruga “Enver Miftari” dhe zonat pranë lumenjve. Qytetarët u udhëzuan të kontaktojnë qendrën 112 për çdo rast urgjent.
Edhe drejtori i Shërbimeve Publike, Kushtrim Ibrahimi, dhe drejtori i Mbrojtjes dhe Shpëtimit, Bejtullah Osmani, kërkuan kujdes të shtuar, duke theksuar se edhe pse situata është stabilizuar, disa zona ende paraqesin rrezik.
Në përgjithësi, komuna njofton se mbetet e angazhuar në monitorimin e vazhdueshëm të situatës.
