Deputeti i Partisë Demokratike të Kosovës, Përparim Gruda, ka qenë i vetmi përfaqësues i kësaj partie që mori pjesë sot në seancën e Kuvendit, ku edhe shpjegoi arsyet zyrtare të bojkotit nga ana e PDK-së. Ai deklaroi se seanca është “e paligjshme dhe jokushtetuese” pasi, sipas tij, Kuvendi nuk mund të vazhdojë me çështje të tjera pa u zgjedhur qeveria e re.
Gruda kërkoi nga kryetari i Kuvendit të verifikojë nëse janë të pranishëm 61 deputetë, teksa theksoi se “kjo seancë do të mbahet mend në historinë e Kosovës si seancë e paligjshme, të cilën e dinë të gjithë nga kryetari i Kuvendit e deri te qytetarët”.
Ai argumentoi se asnjë vend demokratik nuk procedon me formimin e trupave parlamentare apo trajtimin e çështjeve të tjera derisa të bëhet zgjedhja e Qeverisë.
“Jam këtu për ta shpjeguar ligjërisht situatën dhe jo për të bërë propagandë politike. Në asnjë vend tjetër nuk lejohet që Kuvendi të mblidhet për çështje të tjera midis konstituimit të tij dhe zgjedhjes së Qeverisë. Gjatë kësaj periudhe nuk mund të mbahet asnjë seancë,” deklaroi ai.
Gruda gjithashtu ngriti pikëpyetje mbi përpjekjet për formimin e komisioneve parlamentare, duke shtuar se një gjë e tillë është e pamundur pa u përcaktuar qartë se cila parti është në pozitë dhe cila në opozitë.
