Mbrojtësi i Kombëtares së Kosovës, Albian Hajdari, ka reaguar pas atmosferës së ndeshjes së mbrëmshme ndaj Zvicrës, duke i dhënë përkrahje të hapur kapitenit të Zvicrës, Granit Xhakës.
Kosova e mbylli fazën kualifikuese me barazim 1–1 në Prishtinë, në një sfidë të zhvilluar nën reshje të dendura shiu. Kombëtarja dardane mbylli një cikël historik, duke e siguruar për herë të parë vendin e dytë në grup dhe një pozitë në “play-off”.
Megjithatë, Granit Xhaka u përball me fishkëllima nga një pjesë e tifozëve kosovarë pas çdo prekjeje të topit.
Reagimet erdhën pas deklaratave të tij të mëparshme lidhur me vendimet e Albian Hajdarit dhe Leon Avdullahut për ta përfaqësuar Kosovën dhe jo Zvicrën.
Pas ndeshjes, ishte pikërisht Hajdari ai që zgjodhi t’i dërgojë një mesazh uniteti Xhakës. Ai publikoi në rrjetet sociale një fotografi së bashku me Xhakën dhe Avdullahun, të shoqëruar me mbishkrimin: “Ne jemi një”.
Fotografia u rishpërnda edhe nga Leon Avdullahu, duke treguar se edhe ai e përkrah këtë qasje pa tensione. Pak më vonë, imazhi u nda edhe nga vetë Granit Xhaka, duke dhënë një sinjal pajtimi dhe respekti mes lojtarëve.
Ky reagim i Hajdarit vlerësohet si një mesazh i rëndësishëm për sportin dhe unitetin, në një moment të ndjeshëm për të dy përfaqësueset.
