Ish-Sekretari i Thesarit të SHBA-së në administratën e Bill Clinton, Larry Summers, njoftoi sot se po jep dorëheqjen si anëtar i bordit të drejtorëve të OpenAI, një vendim që vjen pas publikimit javën e kaluar të email-eve të tij me pedofilin e dënuar Jeffrey Epstein , raporton CNBC .
Summers njoftoi tërheqjen e tij nga të gjitha angazhimet publike të hënën, por në atë kohë nuk ishte e qartë nëse kjo do të përfshinte pozicionin e tij në startup-in kryesor të inteligjencës artificiale.
“Jam mirënjohës për mundësinë për të shërbyer, i emocionuar për potencialin e kompanisë dhe mezi pres të ndjek progresin e tyre”, tha Summers në një deklaratë për CNBC.
Bordi i drejtorëve të OpenAI tha se e respekton vendimin e Summers për të dhënë dorëheqjen. “Ne e vlerësojmë kontributin e tij dhe perspektivën që ai i ka sjellë Bordit të Drejtorëve”, thuhej në deklaratën e tyre.
Presioni publik pas publikimit të dokumenteve
Detajet e korrespondencës së Summers me Epstein u bënë publike javën e kaluar kur Komiteti i Mbikëqyrjes dhe Reformës Qeveritare i Dhomës së Përfaqësuesve publikoi më shumë se 20,000 dokumente të marra me urdhër gjykate nga pasuria e Epstein.
Pas njoftimit, Summers, i cili është gjithashtu ish-president i Universitetit të Harvardit, u gjend nën presion të fortë publik.
Senatorja demokrate Elizabeth Warren i tha CNN të hënën se universiteti duhet të shkëpusë të gjitha lidhjet me të. Më vonë atë ditë, Summers njoftoi qëllimin e tij për t’u larguar nga detyrat publike, por tha se do të vazhdonte të përmbushte detyrat e tij si mësimdhënës në Harvard.
“Ndihem thellësisht i turpëruar për veprimet e mia dhe e pranoj dhimbjen që ato shkaktuan. Marr përgjegjësi të plotë për vendimin tim të gabuar për të vazhduar komunikimin me z. Epstein”, tha Summers në një deklaratë për CNBC të hënën.
