Kompania Rajonale e Ujësjellësit “Prishtina” ka njoftuar se për shkak të turbullirës së paraqitur në kanalin Ibër–Lepenc dhe pamundësisë për trajtimin e ujit në mënyrë të sigurt, ka filluar furnizimin emergjent me ujë përmes autoboteve në Komunën e Fushë-Kosovës.
Si pjesë e masave të menjëhershme, furnizimi po organizohet sipas zonave me popullsi më të madhe në këtë komunë. Sipas njoftimit, autobotet do të furnizojnë qytetarët në këto lokacione dhe orare:
Lagjja Eliza – nga ora 08:00 deri në 10:00
Te shkolla “Mihail Grameno” (rr. Dardania) – nga ora 10:00 deri në 12:00
Te “Eli Ab” (rr. Dardania) – nga ora 12:20 deri në 14:00 dhe
Te Komuna e Fushë-Kosovës (rr. Tahir Zemaj) – nga ora 14:00 deri në 16:00
KRU “Prishtina” ka bërë të ditur se furnizimi përmes autoboteve do të vazhdojë deri në rikthimin e kushteve të rregullta të trajtimit të ujit nga fabrika në Shkabaj.
Kompania ka paralajmëruar se së shpejti do të publikojë edhe orarin e reduktimeve.
