Lideri i Nismës, Fatmir Limaj pas takimit me presidenten e vendit, Vjosa Osmani që u mblodhën për të caktuar datën e zgjedhjeve të jashtëzakonshme, deklaroi se është koha që Kosova ta ketë një alternativë të fuqishme opozitare, një alternativë, sipas tij, ndryshe.
“Një alternativë e re e cila jep shpresë për ndryshime. Kosovës i duhet një qeverisje ndryshe, dhe për të ndërtuar një qeverisje ndryshe, më shumë se kurrë duhet zëri opozitar, një lidership, një alternativë serioze, duke ndërtuar dy, tri blloqe e më tepër, për të krijuar një mundësi dhe maksimalizuar një votë pro ndryshimit, na duhet bashkimi i njerëzve racional e me përvojë”, deklaroi Limaj.
Kreu i Nismës e ka quajtur lajm të keq që për 9 muaj Kosova nuk arrit të ketë institucioneve për të cilat votuan qytetarët.
Ai ka thënë se qytetarët në zgjedhje duhet t’u kërkojnë llogari përgjegjësve për moskrijimin e institucioneve.
“I ftoj qytetarët të analizojnë mirë këta 9 muaj çfarë ka ndodhur në Kosovë. Është koha për një lidership ndryshe, është koha për një lidershpi të pjekur, racional. Një alternativë që di e ka kapacitet të ndërtojë institucione. Një alternativë e cila ulet në tavolinë, bashkëbisedon e trajton temat me interes të vendit”, deklaroi Limaj.
Ai tha përgjegjësit kryesor pse Kosova sot nuk ka buxhet është tek ata që, sipas tij, të paktën kanë mundur të ndërtojnë një qeveri të konsensusit.
