Në mbarë botën, 417 milionë fëmijë vazhdojnë të jetojnë në varfëri multidimensionale, të privuar nga të paktën dy nevoja themelore si ushqyerja, strehimi apo higjiena. Të dhënat vijnë nga raporti i ri i UNICEF-it, “Gjendja e Fëmijëve në Botë 2025: Fundi i Varfërisë së Fëmijëve – Imperativi ynë i Përbashkët”, i publikuar sot me rastin e Ditës Botërore të Fëmijëve.
Raporti mbështetet në të dhëna nga mbi 130 vende dhe analizon privimet në gjashtë fusha kryesore: arsim, shëndetësi, strehim, ushqyerje, kanalizime dhe ujë. Sipas studimit, 118 milionë fëmijë përjetojnë tre ose më shumë privime, ndërsa 17 milionë vuajnë mungesën e të paktën katër nevojave bazë.
Varfëria më e theksuar është e përqendruar në Afrikën Sub-Sahariane dhe Azinë Jugore. Edhe pse përqindja e fëmijëve me privime të rënda ka rënë nga 51% në vitin 2013 në 41% në vitin 2023, UNICEF paralajmëron se progresi po ngadalësohet për shkak të konflikteve, krizës klimatike, borxhit publik në rritje dhe pabarazive teknologjike. Situata rëndohet edhe nga shkurtimet e konsiderueshme në Ndihmën Zyrtare për Zhvillim (ODA).
Raporti shqyrton edhe varfërinë monetare: mbi 19% e fëmijëve në botë jetojnë në varfëri ekstreme, me më pak se 3 dollarë në ditë. Pothuajse 90% e tyre ndodhen në Afrikën Sub-Sahariane dhe Azinë Jugore.
