Kremlini ka thënë se Rusia nuk ka marrë ende asgjë zyrtare nga Shtetet e Bashkuara në lidhje me planin e paqes prej 28 pikash të SHBA-së për Ukrainën, por se është gati të negociojë.
Uashingtoni i ka paraqitur Kievit një plan që zyrtarët ukrainas thonë se po e studiojnë.
Zëdhënësi i Kremlinit, Dmitry Peskov, tha se Moska dhe Uashingtoni ende nuk po i diskutojnë propozimet në detaje, por se kontaktet po zhvillohen.
“Ka disa ide nga pala amerikane, por asgjë thelbësore nuk po diskutohet aktualisht. Ne jemi plotësisht të hapur, e ruajmë hapjen tonë ndaj negociatave të paqes”, u tha Peskov gazetarëve.
Përparimi rus zvogëlon hapësirën e manovrimit të Ukrainës
Ai gjithashtu theksoi se përparimi rus në fushën e betejës po i ngushton hapësirën për veprim Presidentit ukrainas Volodymyr Zelensky.
“Efektiviteti i forcave të armatosura ruse duhet ta bindë Zelenskyn dhe regjimin e tij se është më mirë të negociohet dhe ta bëhet tani. Është më mirë ta bëhet tani, sesa më vonë. Hapësira e tij e vendimmarrjes po zvogëlohet ndërsa ai humbet territor gjatë veprimeve ofensive të forcave të armatosura ruse”, tha Peskov.
Sipas tij, vazhdimi i luftës është “i pakuptimtë dhe i rrezikshëm” për Ukrainën.
“Regjimi ukrainas duhet të marrë një vendim të përgjegjshëm. Bëjeni tani dhe merrni përgjegjësinë”, shtoi ai.
Zelensky konfirmoi se kishte marrë planin e SHBA-së, por nuk komentoi drejtpërdrejt përmbajtjen e tij. Ai postoi në Telegram gjatë natës se Ukraina ishte “e gatshme për punë konstruktive, të ndershme dhe të shpejtë”.
