BE-ja dhe UKRAINA duan paqe, por nuk do të tërhiqen përballë agresionit rus, tha sot Përfaqësuesja e Lartë e Bashkimit Evropian për Punët e Jashtme Kaja Kallas, ndërsa agjencitë botërore raportuan se vendet evropiane po punojnë për propozimin e tyre për t’i dhënë fund luftës në Ukrainë, pasi u publikuan detajet e planit amerikan.
“Ky është një moment shumë i rrezikshëm për të gjithë,” u tha Kallas gazetarëve.
“Ne të gjithë duam që kjo luftë të mbarojë, por ajo që ka rëndësi është se si mbaron. Rusia nuk ka të drejtë ligjore për asnjë lëshim nga vendi që ka pushtuar, në fund të fundit kushtet e çdo marrëveshjeje vendosen nga Ukraina.”
Kundërpropozimi evropian ndaj planit amerikan të paqes
Ukraina, Franca, Gjermania dhe Britania e Madhe po punojnë mbi një kundërpropozim për një plan paqeje prej 28 pikash për Ukrainën të mbështetur nga Shtetet e Bashkuara, thanë tre burime për Reuters të premten.
Një nga burimet tha se kundërpropozimi ka të ngjarë të përfshijë edhe vende të tjera evropiane.
Plani amerikan parashikon lëshime të konsiderueshme territoriale për Ukrainën dhe dobësim ushtarak të vendit me garanci sigurie.
Zyra e Kancelarit Gjerman njoftoi se udhëheqësit gjermanë, francezë dhe britanikë ranë dakord të premten gjatë një bisede telefonike me presidentin ukrainas mbi “ruajtjen afatgjatë të interesave jetësore evropiane dhe ukrainase”.
Pas prezantimit të planit amerikan, i cili përfshin lëshime të shumta ukrainase ndaj Rusisë pas pothuajse katër vitesh lufte, Friedrich Merz, Emmanuel Macron dhe Keir Starmer mirëpritën “përpjekjet amerikane”, por gjithashtu i përcollën Volodymyr Zelensky-t “mbështetjen e tyre të plotë dhe të palëkundur në rrugën drejt një paqeje të qëndrueshme dhe të drejtë”.
Të katër udhëheqësit “përshëndetën veçanërisht angazhimin ndaj sovranitetit të Ukrainës dhe gatishmërinë për t’i ofruar asaj garanci të forta sigurie”.
Zelensky shpall alternativa ndaj planit të SHBA-së
Presidenti ukrainas Volodymyr Zelensky njoftoi të premten se do të propozojë “alternativa” ndaj planit të SHBA-së për t’i dhënë fund konfliktit me Rusinë, duke thënë se nuk do të tradhtojë interesat kombëtare të vendit të tij.
Në një deklaratë video, ai u bëri thirrje ukrainasve të qëndrojnë të bashkuar në atë që e përshkroi si një nga momentet më të vështira në historinë e vendit, duke shtuar se priste më shumë presion politik gjatë javës së ardhshme.
Zelensky tha se do të propozonte “alternativa” ndaj planit amerikan për t’i dhënë fund konfliktit, i cili në përgjithësi shihet si shumë i favorshëm për Moskën, duke premtuar se nuk do të “tradhtojë interesat” e Ukrainës.
“Do të paraqes argumente, do të bind, do të propozoj alternativa”, tha Zelensky në një video-fjalim drejtuar kombit.
Ai paralajmëroi se Ukraina rrezikon të humbasë mbështetjen e SHBA-së për shkak të planit të Uashingtonit për t’i dhënë fund luftës me Rusinë.
“Ukraina mund të përballet me një zgjedhje shumë të vështirë: humbjen e dinjitetit ose rrezikun e humbjes së një partneri kyç”, tha Zelensky në një video-fjalim drejtuar kombit.
