Një rast i falsifikimit të parasë është raportuar në Pejë, pasi një punonjës banke ka hasur në kartëmonedha të dyshuara gjatë procesit të kontrollimit të depozitave.
Sipas Policisë së Kosovës, rasti është evidentuar në rrugën “Tony Blair” në Pejë, më 21 nëntor 2025. Punonjësi kosovar i bankës ka njoftuar se gjatë verifikimit të parave të deponuara më 7 nëntor 2025, ka identifikuar një kartëmonedhë 20 euro dhe një tjetër në vlerë prej 1,000 frangash zvicerane, për të cilat dyshohet se janë të falsifikuara.
Kartëmonedhat janë sekuestruar dhe janë dërguar për ekzaminime të mëtejshme ekspertize. Policia konfirmon se rasti është duke u hetuar.
