Veteranët e futbollit në kohë shumë më të vështira se sot, mbajtën gjallë pasionin për lojën dhe vendosën themelet mbi të cilat po ndërtohet futbolli ynë modern, ka vlerësuar Federata e Futbollit e Kosovës.
Liga e Veteranëve ka vizituar FFK-në të hënën në Prishtinë.
“Sot, në ambientet e FFK-së, patëm nderin të mirëpresim Ligën e Veteranëve, njerëzit që e kanë shkruar historinë e futbollit tonë me mund, djersë dhe sakrificë. Ata, në kohë shumë më të vështira se sot, mbajtën gjallë pasionin për lojën dhe vendosën themelet mbi të cilat po ndërtohet futbolli ynë modern. Takimi me ta ishte një rikthim te rrënjët, te vlerat e vjetra që nuk duhen harruar. Ata erdhën për të na përgëzuar për arritjen historike të Kombëtares, e cila i gëzoi të gjithë, por për ta kjo arritje kishte një peshë edhe më të madhe. Sepse ata luftuan për fanellën dhe dhanë gjithçka pa kërkuar asgjë në këmbim, madje duke mos qenë të pranuar as ndërkombëtarisht. Tek ta shohim krenari, mirënjohje dhe besim se futbolli ynë po ecën drejt një të ardhmeje edhe më të ndritur. Veteranët shprehën mirënjohje edhe për tifo-grupin “Dardanët”, të cilët i përgëzuan për animin korrekt, motivimin e futbollistëve dhe shembullin e madh të qytetarisë që e tregojnë në të gjitha ndeshjet, duke ritheksuar se tifozët janë lojtari i 12-të. Respekt i pafund për secilin prej tyre për trashëgiminë, kontributin dhe frymën që vazhdon të na inspirojë”, ka theksuar FFK. “Gjenerata e sakrificës e hapi rrugën e zhvillimit, ndërsa ne sot po ecim mbi gjurmët e tyre. Faleminderit që gjithmonë na qëndroni afër. Së bashku edhe njëherë rikujtuam se suksesi i sotëm ka rrënjë të thella”.
