Radio Televizioni i Kosovës po përballet me vështirësi serioze financiare si pasojë e mungesës së vendimmarrjes në Kuvend lidhur me çështjen e buxhetit të institucionit.
Ushtruesi i detyrës së Drejtorit të Përgjithshëm të RTK-së, Hysen Hundozi, ka shprehur keqardhjen që kjo çështje nuk u zgjidh përmes themeluesit të Transmetuesit Publik, duke theksuar se situata e krijuar po rëndon mbi funksionimin e institucionit dhe veçanërisht mbi punonjësit, të cilët tashmë po përballen me vonesa të pagave dhe pasiguri të vazhdueshme.
Ai ka njoftuar se menaxhmenti i RTK-së është duke punuar intensivisht për të gjetur një zgjidhje të shpejtë dhe të qëndrueshme, njësoj si tre muaj më parë kur u përballën me sfida të ngjashme.
“Dua t’i siguroj të gjithë kolegët, partnerët dhe publikun se ne jemi duke punuar intensivisht për të gjetur një zgjidhje sa më të shpejtë dhe të qëndrueshme, ashtu siç kemi bërë edhe tre muaj më parë. Ne jemi në kontakt të vazhdueshëm me institucionet relevante në vend dhe me partnerët tanë, për të siguruar funksionimin normal të Transmetuesit Publik”, ka theksuar Hundozi.
Ai ka bërë apel që RTK të mos përdoret si mjet presioni apo si instrument për agjenda politike, duke theksuar se ky institucion i takon qytetarëve dhe duhet të mbetet jashtë çdo ndikimi që cenon misionin e tij profesional, të pavarur dhe kushtetues.
