Instituti i Medias i Kosovës kërkon urgjentisht të zgjidhet çështja e pagave për RTK-në
“Mungesa e mjeteve financiare për pagat e punëtorëve të RTK-së është e patolerueshme dhe paraqet dështim serioz të institucioneve shtetërore. Si Institut i Medias, kërkojmë urgjentisht që kjo situatë të zgjidhet pa asnjë vonesë të mëtejshme. IMK vlerëson se për gjendjen e krijuar përgjegjës janë të gjitha subjektet politike, pa përjashtim”, thuhet në komunikatë.
Sipas këtij, instituti, punëtorët kanë paralajmëruar vazhdimisht për rrezikun real që RTK të mbetet pa paga, ndërsa politika ka zgjedhur ta injorojë këtë krizë.
“As pozita, as opozita nuk kanë ndërmarrë asnjë hap konkret. Kjo është e papranueshme. RTK nuk është instrument i politikës; është medium publik që financohet nga taksat e qytetarëve dhe u takon atyre. Ftojmë Qeverinë e Kosovës që menjëherë të sigurojë mjetet për pagat e punëtorëve. Çdo neglizhencë e mëtutjeshme vetëm sa e thellon pakënaqësinë dhe e shton rrezikun e largimit të profesionistëve nga ky medium publik. IMK kërkon përgjegjësi dhe veprim të menjëhershëm. RTK nuk mund dhe nuk duhet të lihet në mëshirë të lojërave politike. Institucionet duhet të reagojnë tani”, thuhet në komunikatë.
