Zyrtarët policorë të rajonit të Prishtinës kanë vazhduar aktivitetet operacionale dhe kontrolluese edhe gjatë javës së kaluar, duke ndërmarrë aksione të ndara në lokacione të ndryshme të kryeqytetit.
Sipas Policisë, gjatë kësaj periudhe janë ekzekutuar gjithsej 192 urdhëresa të gjykatës, prej të cilave 57 për vepra penale, ndërsa të tjerat kanë qenë për kundërvajtje, seanca gjyqësore, verifikime dhe procedura të tjera ligjore.
Në bazë të këtyre urdhëresave, personat e dënuar me burgim janë dërguar për vuajtje të dënimit, ndërsa të dënuarit me gjoba janë liruar pasi kanë përmbushur obligimet e parashikuara.
Aktivitetet policore janë shtrirë edhe në fushën e sigurisë publike.
Në të njëjtën periudhë janë sekuestruar 11 armë zjarri të llojeve dhe kalibrave të ndryshëm.
Po ashtu, janë shqiptuar 3,997 masa administrative me gjobë për shkelje të ndryshme të Kodit Rrugor, ku 502 prej tyre janë evidentuar nga veturat inteligjente dhe ato me radar mobil.
Policia ka njoftuar se kontrollet dhe aktivitetet parandaluese do të vazhdojnë edhe në ditët në vijim me qëllim rritjen e sigurisë dhe rendit publik.
