Arabia Saudite planifikon të hapë dy dyqane të reja pije alkoolike, ndërsa vendi përgatitet të presë Kupën e Botës 2034, raportoi Reuters.
Arabia Saudite planifikon të hapë dy dyqane të reja pijesh alkoolike – njëri prej të cilëve do t’u shërbejë punonjësve të huaj jo-muslimanë të kompanisë shtetërore të naftës Aramco – ndërsa mbretëria lehtëson më tej kufizimet mbi konsumin e alkoolit, raporton Reuters.
Hapja e këtyre dyqaneve në provincën lindore të Dhahranit dhe një dyqani për diplomatët në qytetin bregdetar të Xhedës do të shënojë një tjetër moment historik në përpjekjet, të udhëhequra nga udhëheqësi de facto Princi Mohammed bin Salman, për të “hapur” më tej vendin.
Mbretëria, e cila është vendlindja e Islamit, vitin e kaluar hapi një dyqan të ngjashëm që u shërbente diplomatëve jo-muslimanë në kryeqytetin Riad – dyqani i parë i tillë që nga vendosja e ndalimit 73 vjet më parë.
Dyqani i ri në provincën Dhahran do të ngrihet në një kompleks në pronësi të Aramco-s dhe do të jetë i hapur për jo-muslimanët që punojnë për kompaninë, sipas burimeve që folën për Reuters.
Dy nga burimet thanë se një dyqan i tretë pijesh alkoolike është gjithashtu në fazat e planifikimit për diplomatët jo-muslimanë në qytetin e Xhedës, ku shumë vende të huaja kanë konsullata.
Mbretëria ka lehtësuar kufizimet për të tërhequr turistë dhe biznese ndërkombëtare, si pjesë e një plani ambicioz për të diversifikuar ekonominë e saj dhe për të zvogëluar varësinë nga nafta.
Këto lëvizje vijnë gjithashtu në një kohë kur Arabia Saudite po përgatitet të presë Kupën e Botës 2034 , me miliona tifozë që tradicionalisht kombinojnë shikimin e futbollit me një gotë birrë.
