Kryesuesi i Kuvendit Komunal të Prishtinës, Fehmi Kupina ka thirrur seancë të jashtëzakonshme për bartjen e mjeteve vetanake të kryeqytetit dhe për buxhetin e vitit 2026.
Seanca do të mbahet të enjten, më 27 nëntor, në orën 15:00, derisa ajo do të mbahet me përbërjen e vjetër të asamblistëve dhe jo me asamblistët e rinj të dalë nga zgjedhjet e 12 tetorit.
Asamblisti i Lëvizjes Vetëvendosje, Egzon Azemi duke folur në konferencë për media të këtij subjekti lidhur me këtë çështje ka thënë se ‘sot kryetari Rama e kuptoi dhe e pranoj se ka gabuar edhe për deklaratat e tij të mëparshme për mjetet vetanake’.
“Ai disa herë i ka përmendur të hyrat vetanake se kinse po ia bllokon qeveria, mirëpo sot pas takimit që e patën sindikatat me ministrin e financave kanë shkuar në Komunën e Prishtinës dhe ia kanë shpjeguar procedurën se si realisht shkon bartja e buxhetit për të hyra vetanake dhe sot kryetari Rama ftoj një mbledhje urgjente të Kuvendit Komunal. Pra, është fare e qartë se vet kryetari Rama me këtë thirrje të kësaj seance e ka pranuar realisht se fajtori dhe ideatori i kësaj bllokade është vet ai. Por sot ka qenë në presion nga protestuesit dhe është detyruar ta ftojë seancën e re të Kuvendit Komunal. Është një seancë e vonuar që ka mundur të ftohet shumë më herët, sepse askush nuk e ka ndaluar ekzekutivin e komunës të thërras seancë dhe ta zhbllokojë këtë pikë”, tha ai.
