Autoritetet në Serbi kanë njoftuar se është arrestuar një person me inicialet A.Q. të cilin e konsiderojnë ish-pjesëtar të Ushtrisë Çlirimtare të Kosovës. Sipas Ministrisë së Punëve të Brendshme të Serbisë, ai dyshohet për organizim të grupit dhe nxitje për kryerje të gjenocidit dhe krimeve të luftës gjatë viteve 1998–1999.
Në njoftim thuhet se i dyshuari iu bashkua shtabit lokal të UÇK-së në Romajë të Prizrenit dhe ka marrë pjesë në sulmet në postin kufitar serb në Koshare si pjesë e brigadës 138 “Agim Ramadani”.
A.Q., i lindur në vitin 1973, është ndaluar për 48 orë dhe ndaj tij pritet të dorëzohet kallëzim penal, thonë autoritete serbe, njoftojnë mediat në Serbi.
Institucionet e Kosovës ende nuk kanë reaguar për këtë rast.
Kujtojmë se viteve të fundit, disa shtetas të Kosovës janë arrestuar në Serbi nën dyshimet për krime lufte, përfshirë rastin e Lulzim Halilit në korrik të këtij viti.
