“Kopshti është një detyrë e madhe të cilës ia përkushtoj veten plotësisht. Do të më marrë vitet e fundit të jetës dhe unë do të bie, i rraskapitur, nën degët e tij, pasi t’i kem dhënë gjithë dashurinë time”, tha Jacques Majorelle për kryeveprën e tij…
“Për vite me radhë, kam gjetur një burim të pashtershëm frymëzimi në Kopshtin Majorelle dhe shpesh kam ëndërruar për ngjyrat e tij unike”, tha stilisti i famshëm francez Yves Saint Laurent gjatë jetës së tij për vendin që tani frymëzon qindra mijëra vizitorë në vit. Dashamirësit e artit vijnë nga të gjitha anët e botës për të admiruar nuancat e bukura të blusë dhe të gjelbër, bimët dhe arkitekturën e Kopshtit Majorelle – një nga më të bukurit në Marok. Jardin Majorelle është një kopsht botanik dhe arti që është bërë një nga atraksionet më të vizituara në vend. Artisti francez Jacques Majorelle i kushtoi katër dekada të jetës së tij, gjatë të cilave e krijoi atë, dhe më vonë u restaurua nga Yves Saint-Laurent. Djali i një stilisti të famshëm mobiljesh, Jacques Majorelle është një piktor i famshëm për të cilin kopshti i tij ishte një kryevepër e jetës.
Ai mbërriti në Marok në vitin 1917, fillimisht në Kazablanka dhe më pas në Marrakesh. Ai bleu tokë dhe gradualisht e zgjeroi atë, duke kultivuar 135 lloje bimësh nga pesë kontinente. Prona e tij përfundimisht u bë një oaz kaktusësh, jukash, jasemini, bugainvile, palmash, zambakësh uji të bardhë, bambuje dhe bimësh të tjera. Ai i lyeu ndërtesat në pronë me një nuancë që e përzieu dhe e mbrojti vetë – një blu të pastër dhe intensive të njohur si bleu Majorelle , ose blu Majorelle.
“Kopshti është një detyrë e madhe të cilës ia përkushtoj veten plotësisht. Do të më duhen vitet e fundit të jetës dhe unë do të bie, i rraskapitur, nën degët e tij, pasi t’i kem dhënë gjithë dashurinë time”, tha Jacques Majorelle, duke iu referuar kohës, përpjekjeve, por edhe parave, sepse projekti i jetës së tij kërkonte investime të konsiderueshme. Për të mbuluar kostot e mirëmbajtjes, artisti e hapi pronën e tij për publikun dhe jo shumë kohë më pas jeta e tij mori tatëpjetën. Ai u divorcua nga gruaja e tij Andrée Longueville, gjë që e detyroi të ndante pronën. Shpejt ai pati një aksident të rëndë me makinë, i cili rezultoi në amputimin e këmbës së tij të majtë.
Operacionet ia shteruan financat dhe ai u detyrua të shiste pjesën e tij të vilës dhe kopshtit. Ai shkoi në Paris për trajtim, ku vdiq në vitin 1962 nga plagët e marra. Pas vdekjes së tij, Jardin Majorelle u rrënua, por katër vjet më vonë, lindi shpresa – në formën e stilistit francez të modës Yves Saint-Laurent dhe partnerit të tij të biznesit (dhe atëherë të dashurit) Pierre Bergé. Dyshja zbuloi kopshtin në vitin 1966 dhe kur dëgjuan në vitin 1980 se prona do të shembej dhe do të shndërrohej në një kompleks hotelesh, ata menjëherë e blenë atë dhe filluan ta restauronin.
