Kryetari i Prishtinës, Përparim Rama, iu bashkua sot punëtorëve të “Trafikut Urban” dhe operatorëve privatë të transportit, duke ritheksuar se kriza e transportit publik në kryeqytet mund të zgjidhet menjëherë nëse Ministria e Financave liron fondet komunale.
Sipas tij, rreth 35 milionë euro të buxhetit të Prishtinës po mbahen “jashtëligjshëm” nga ministria, gjë që po pengon pagesën e punëtorëve dhe funksionimin e shërbimeve thelbësore.
Rama u bëri thirrje Kurtit dhe Muratit që të “reflektojnë” dhe të lënë anash tensionet politike. Ai tha se me pagesën e fondeve, operatorët publikë dhe privatë do të riktheheshin menjëherë në funksion dhe qytetarët nuk do të mbeteshin pa shërbime bazë si transporti dhe infrastruktura komunale.
Kreu i Prishtinës njoftoi gjithashtu se komuna ka dorëzuar kallëzim penal ndaj ministrit në detyrë Hekuran Murati dhe tre zyrtarëve të tjerë, pasi sipas tij, mbajtja e mjeteve nuk ka asnjë bazë ligjore. Ai kritikoi faktin që Murati nuk e takoi një ditë më parë, duke ngritur dyshime se “çka po fshihet”.
“35 milionë euro që mbahen jashtëligjshëm në Ministrinë e Financave mund të paguhen sot, në këtë moment. Nuk ka asgjë që e ndal këtë pagesë. Me këtë shumë paguhen të gjithë operatorët dhe asnjë qytetar nuk mbetet pa shërbime. Ministri e ka mundësinë, dje, sot dhe me muaj të tërë, por refuzon ta bëjë”, ka thekruar Rama.
Ai shtoi se përveç kallëzimit penal, komuna ka ndërmarrë masa të tjera, përfshirë thirrjen e një seance të jashtëzakonshme të Kuvendit Komunal. Sipas Ramës, edhe fondet e tjera prej 28 milionë eurosh, të cilat pritet të votohen nga asamblistët, do t’i ndihmonin komunës të përballojë krizën, por theksoi se “fakti kryesor mbetet se 35 milionë euro vetanake mbahen në mënyrë joligjore nga ministri”.
Rama përfundoi duke bërë thirrje të menjëhershme për lirimin e fondeve, duke e cilësuar çdo diskutim tjetër si “hi syve qytetarëve”.
