Lëvizja Vetëvendosje – Qendra në Prishtinë ka paralajmëruar se në seancën e jashtëzakonshme të Kuvendit Komunal të Prishtinës që është thirrur për të enjten, ku si pikë e rendit të ditës është bartja e mjeteve nga viti 2024 në vitin 2025, do të jenë prezentë për të votuar.
“Asamblistët e LVV-së të enjten do të jenë prezent në seancën e Kuvendit Komunal të Prishtinës për ta votuar bartjen e mjeteve nga viti 2024 në 2025, këto mjete për të cilat Përparim Rama e traumatizoi një Kosovë, e të cilat nuk i kërkoi aty ku është vendi në Kuvendin Komunal të Prishtinës. Ky nuk ka qenë gabim i Përparim Ramës, ky ka qenë qëllim i tij që të krijojë kauza, sepse kur dështon në menaxhim dhe nuk ke për çfarë i akuzon kundërshtarët, pa mëdyshje që duhet ndërtimi i një kauze, kauzë të cilën e rrënoi vetë me verimet e djeshme”, deklaroi nga Lëvizja Vetëvendosje.
Në konferencë për media, Sveçla tha se është dita e dytë që qytetarët e Prishtinës janë të privuar nga shërbimet e Trafikut Urban. “E gjithë kjo si rezultat i politikës dhe qasjes së Përparim Ramës së Lidhjes Demokratike të Kosovës në krye me Lumir Abdixhikun. Sot kishim një deklaratë të Ramës që tha se thirrja e seancës për legjislaturën e kaluar të Kuvendit Komunal të Prishtinës, është një mundësi opsionale për të inkasuar të hyrat vetanake për të cilat ai tash e sa kohë ka ngritur kauzë të vetën dhe të partisë së vetë. Duhet potencuar këtu qartë, sepse kjo nuk është opsion por është rruga e vetme ligjore”, deklaroi Sveçla.
Sipas tij, vetë ftesa për seancë e dëshmon pranimin e fajësisë nga Rama.
“Ai i ka traumatizuar qytetarët e Prishtinës e jo vetëm, me kërkesat e tij të padrejta dhe ligjërisht të paqëndrueshme për bartje të mjeteve vetanake kur këtë gjë nuk e ka kaluar në Kuvendin Komunal të Prishtinës”, tha tutje ai.
Sveçla tha se Rama po bën shfaqje teatrale. “Siç ishin ato sot që i pamë në mesin e protestuesve, në mesin e punëtorëve të Trafikut Urban ku në stilin e një banditeski bërtiste ‘çiti paret, çiti paret’, sepse tashmë ai e ka kuptuar që edhe punëtorët e Trafikut Urban e kanë kuptuar ku është adresa e dështimit të ndërmarrjes së tyre, adresa vonesës së pagave të tyre”, tha ai.
Sveçla tha se do të jenë krah i punëtorëve në kërkesat e tyre, që i quajti të drejta dhe legjitime.
“Kërkojmë nga Rama që të ndërpresë keqmenaxhimin financiar në ndërmarrje, sepse në të vërtetë parashikimet për të ardhmen në Komunën e Prishtinës janë shumë të zymta. Komuna e Prishtinës ka miliona borxh, kjo paraqet rrezik për çdo shërbim në kryeqytet”, tha Sveçla.
Mbledhja e jashtëzakonshme e Kuvendit Komunal të Prishtinës ka në rend dite dy pika, bartjen e mjeteve nga viti 2024 në vitin 2025 si dhe miratimin e buxhetit për vitin 2026.
