Si kryeqyteti, problem me buxhet ka edhe komuna e Zubin Potokut. Mosmiratimi i buxhetit për vitin 2025 ka vënë zyrtarët komunalë përball sfidave të shumta. Në këtë situatë, shumë projekte dhe shërbime komunale janë pezulluar, pavarësisht ndihmës së ekzekutivit, e cila nuk ka munguar.
Komuna e Zubin Potokut vazhdon të operojë me buxhetin e vitit 2024.
“Se asambleja komunale na i vonoi në afatet ligjore për miratimin e buxhetit dhe natyrisht në ato zgjedhje dhe fushata që kanë pasur, ne mbetëm pa buxhetin për vitin 2025. Për këtë arsye kemi operuar me vendimin e qeverisë për 1/12 e buxhetit. Muajt e fundit, që prej shtatorit, kemi mundur të shfrytëzojmë pjesërisht buxhetin e vitit 2024”, tha Izmir Zeqiri, kryetar i Zubin Potokut.
Mungesa e buxhetit komunal ka vënë përball vështirësive financiare funksionimin e ndarjeve komunale dhe të stafit administrativ.
“Kemi qenë në rrezik për një kohë të caktuar, dhe mesiguri qeveria e ka rregulluar këtë problem lidhur me rrogat dhe disa çështje të tjera. Tani problemi është zgjidhur, dhe mbesim që strukturat e reja ta rregullojnë në të ardhmen”, tha Darko Radojeviq, zyrtar në komunën e Zubin Potokut.
“Kemi qenë në rrezik të mbetemi pa rroga, por duke i falënderuar kryetarit, është gjetur zgjidhja më e mirë e e mundshme dhe tash kemi marrë rrogat”, tha Eshref Ferizi, drejtor i Urbanizmit në komunën e Zubin Potokut.
Pavarësisht thirrjeve të ekzekutivit dhe vetë presidentes që partitë parlamentare të miratojnë buxhetin për tri komuna, pjesë e së cilës është edhe Zubin Potoku, opozita e bojkotoi votimin. Ndërkohë, komuna e Zubin Potokut vazhdon të mbetet nën presionin e borxheve dhe mungesës së mjeteve të planifikuara për vitin 2025.
