Kjo është një nga disa dëshmi të ngjashme të mbledhura nga BBC që tregojnë taktikat e përdorura nga luftëtarët rusë ndërsa ata kryen një operacion brutal kundër militantëve islamikë.
Një juntë ushtarake mori pushtetin në Mali në vitin 2021, duke i detyruar trupat franceze të tërhiqeshin pasi i akuzoi ato për dështimin në shtypjen e rebelimit. Junta iu drejtua Rusisë, duke kërkuar ndihmën e grupit mercenar Wagner.
Disa nga mercenarët e Wagnerit i nxorën në pah mizoritë e tyre në një grup në Telegram, sipas një raporti të publikuar muajin e kaluar nga Këshilli Evropian për Marrëdhëniet me Jashtë.
Raporti shtoi se ata “ndanin rregullisht foto dhe video të vrasjeve, përdhunimeve, torturave, kanibalizmit dhe përdhosjes së kufomave të rebelëve dhe civilëve të dyshuar”.
Tregtari i intervistuar nga gazetarët e BBC-së iku nga Mali dhe tani jeton në një kamp refugjatësh përtej kufirit në Mauritani.
BBC deklaron se emrat e të gjithë aktorëve, përfshirë tregtarin, janë ndryshuar për qëllimet e shkrimit të tekstit, me qëllim ruajtjen e identitetit dhe mbrojtjen e tyre.
Tregtari i tha BBC-së se përvoja e tij e hidhur filloi kur luftëtarët e Wagnerit shkuan me makinë në dyqanin e madh që ai drejtonte në qytetin qendror të Nampalës në gusht 2024.
“Më çuan te automjeti, më futën brenda dhe më lidhën duart. Një ushtar i Wagnerit mori një thikë, ma vuri në gisht dhe më pyeti: ‘Ku është pronari i dyqanit?’ I thashë se ishte në kryeqytet, por ai u përgjigj: ‘Përgjigje e gabuar'”, kujton dyqanxhiu.
Ai shton se njerëzit e Wagnerit, të cilët folën nëpërmjet një përkthyesi, e çuan atë në një bazë ushtarake të fortifikuar mirë në Mali dhe e vendosën në një hangar.
“Unë dhe tre nga djemtë e Wagnerit ishim në hangar. Ata e mbushën rezervuarin me ujë dhe më kërkuan të hiqja rrobat. Unë i hoqa. Ata më zhytën kokën në ujë derisa pothuajse fillova të mbytesha dhe të rrëzohesha. Pastaj ata vunë këmbët në gjoksin tim dhe fillova të merrja frymë me vështirësi. “Pastaj ata më zhytën kokën përsëri në ujë dhe më pyetën për herë të dytë për pronarin e dyqanit, dhe unë u thashë se ai ishte në Bamako”, tha tregtari Ahmed, duke shtuar se tortura u përsërit për herë të tretë, dhe se ai dha të njëjtën përgjigje.
Pas kësaj prove, Ahmedi tha se e hodhën në një tualet të vogël, ku kishte edhe vendas të tjerë që ai njihte, përfshirë Husseinin, i cili ishte rrahur aq shumë sa nuk mundi ta njihte në fillim.
“Rreth 40 minuta më vonë, ata sollën Umarin, një të njohur tjetër. Edhe ai ishte në një situatë të tmerrshme. E torturuan. Ne fjetëm në atë tualet dhe të nesërmen në mëngjes ata sollën një copë bukë dhe një filxhan të vogël kafeje”, tha Ahmedi.
Pastaj ai u kthye në hangar, ku luftëtarët rusë i mbështollën një fashë rreth fytyrës dhe kokës.
“Nuk mund të shihja. Nuk mund të flisja. Nuk mund të dëgjoja. Më vunë një thikë në fyt dhe i thanë përkthyesit të më thoshte se ky ishte shansi im i fundit. Nëse nuk do t’u tregoja të vërtetën, do të më prisnin kokën. I thashë përkthyesit se u kisha dhënë të gjithë informacionin që kisha”, thotë ai.
Ai thotë gjithashtu se ka qenë dëshmitar i prerjes së kokës së dy burrave në hangar.
Ahmedi tha se jeta e tij u kursye vetëm pasi komandanti i Wagnerit telefonoi një oficer të ushtrisë maliane, i cili e siguroi se pronari i dyqanit nuk ishte në bashkëpunim me militantët.
Ahmedi tha se komandanti më pas shkoi në bazë për ta liruar atë, si dhe një pronar tjetër dyqani dhe Umarin.
“Kalova 15 ditë atje. Pastaj vendosa të shkoj në Mauritani me gruan dhe fëmijët e mi”, tha Ahmedi.
BBC kontaktoi ministritë e mbrojtjes të Rusisë dhe Malit për koment, por ato ende nuk kanë dhënë përgjigje.
Në qershor të këtij viti, Wagner njoftoi tërheqjen e tij nga Mali dhe analistët pohojnë se shumica e luftëtarëve të tyre janë përfshirë në Korpusin Afrikan.
Konflikti ka detyruar gati 50,000 njerëz të ikin në kampin e refugjatëve M’berra në Mauritani, sipas agjencisë së OKB-së për refugjatët.
Midis tyre është Bintu, e cila i tha BBC-së se iku nga fshati i saj vitin e kaluar me pesë fëmijët e saj, pasi trupi i burrit të saj u hodh në një lumë. Vendasit i thanë se ai ishte qëlluar disa herë ndërsa po hipte mbi kalë.
“Kur dëgjoj emrin Wagner, ndihem e traumatizuar. Ndihem e frikësuar. E urrej fjalën Wagner sepse më solli trishtim”, tha ajo.
Ahmedi, një ish-tregtar, tha se përpara përvojës së tij të tmerrshme, ai e kishte parë Wagnerin të kryente krime në shkallë masive, në një rast duke rrethuar të gjithë qytetin e Nampalës dhe fshatrat përreth.
Ai gjithashtu thotë se dëshiron që luftëtarët e Wagner të nxirren para drejtësisë dhe të mbahen përgjegjës për mizoritë e tyre.
«Kjo përvojë më përndjek. Më jep ankthe», tha ai ndërsa ishte ulur i veshur tërësisht me rroba të zeza në kamp, i pasigurt nëse do të kthehej ndonjëherë në jetën e tij të zakonshme si tregtar.
