Gëzim Sveçla, nga LVV, ka kritikuar të parin e kryeqytetit për, siç u shpreh ai, keqmenaxhim të jashtëzakonshëm të buxhetit të komunës.
“Jemi këtu, sepse qyteti është bllokuar, shërbimi ka rënë, sepse punëtorët kanë mbetur pa paga, sepse autobusët janë ndalur, sepse një kryetar i papërgjegjshëm e ka çuar administrimin komunal në nivelin zero”, ka deklaruar Sveçla.
Ai theksoi se Përparim Rama për muaj të tërë ka qarë nëpër studio televizive duke akuzuar qeverinë për bllokim të të hyrave vetanake, por, shtoi ai, “vetëm kur punëtorët e Trafikut Urban dolën në rrugë, kur autobusët ndaluan qarkullimin, kur qyteti u bllokua, atëherë e kuptoi që bartja e mjeteve nuk bëhet në studio televizive, por bëhet këtu në Kuvendin Komunal”.
“Ne asamblistët e LVV-së do ta votojmë bartjen e mjeteve, jo për ta shpëtuar Përparim Ramën por për t’i ndihmuar Prishtinës nga zullumi i Përparim Ramës,. Votojmë sepse kemi detyrim ndaj qytetit, sepse punëtori i Trafikut Urban nuk është fajtor për paaftësinë e Përparimit, sepse pensionisti e studenti që pret autobusin në stacion nuk duhet të paguajë çmimin e dështimeve të Përparimit, buxheti i Prishtinës nuk është mjet i pazareve politike, është instrument i shërbimeve publike”, ka deklaruar Sveçla.
Rafuna: Vendimi për buxhetin hap i domosdoshëm për Prishtinës
Jeta Rafuna, nga LDK-ja, tha se jemi para një vendimi të rëndësishëm për funksionimin e kryeqytetit. Ajo tha se vendimin për bartjen e mjeteve buxhetore nga vitit 2024 në vitin 2025, nuk është thjesht një vendim teknik.
Sipas saj, është një hap i domosdoshëm për të ruajtur vazhdimësinë e projekteve tona dhe për të siguruar që asnjë qytetar i Prishtinës të mos mbetet peng i vonesave të imponuara.
Ajo shtoi se bartja e mjeteve është mjet ligjor për të garantuar që investimet tona të vazhdojnë pa ndërprerje.
“Ne nuk po bartim vetëm mjete financiare. Ne po bartim përgjegjësi, planifikim, vazhdimësi dhe besimin e qytetarëve që na votuan për të përfunduar punët e nisura. Kjo bartje nuk është luks, është domosdoshmëri. Nëse nuk e miratojmë, projektet mbeten të ngrira, kontratat rrezikohen e mbi të gjitha qytetarët humbin”, ka theksuar Rafuna.
Zabergja paralajmëron krizë sociale në kryeqytet për shkak të mosmiratimit të buxhetit
Endrit Zabergja nga Nisma Socialdemokrate ka paralajmëruar një krizë sociale në kryeqytet për shkak të mungesës së mjeteve për funksionalizimin e shërbimeve bazike për qytetarët.
Në një deklaratë, ai tha:“Jemi para një krize sociale, pa mjete për t’i funksionalizuar shërbimet bazike të qytetarëve. Nëse marrim historikun dhe ta shohim këtë pikë siç është trajtuar në kryeqytet, kjo është hera e gjashtë që po e trajtojmë edhe buxhetin edhe bartjen”, tha ai
Zabergja theksoi se pasojat e mosmiratimit të buxhetit ndjehen drejtpërdrejt tek qytetarët:
“Ai grusht votash zot qytetarëve po iu kushton me mungesën e transportit publik, me fëmijët tanë pa çerdhe e shkolla, me kontrata të dështuara e me mungesë pagash”.
Ai u bëri thirrje partive që të bëjnë betejat politike ndryshe, pa dëmtuar qytetarët.
