Personi që ishte raportuar i zhdukur një ditë më herët është gjetur pa shenja jete në pendën e fshatit Livoç në Gjilan, ka bërë të ditur Policia e Kosovës.
Sipas zëdhënësit të Policisë për rajonin e Gjilanit, Valon Osmani, trupi është lokalizuar të premten nga ekipet e zhytësve të Forcës së Sigurisë së Kosovës.
“Gjatë kërkimeve të vazhdueshme, sot më 28.11.2025 rreth orës 12:45, ekipet e specializuara të zhytësve të FSK-së kanë gjetur në pendën e fshatit Livoç trupin e pajetë të personit të raportuar si i zhdukur më 27.11.2025. Vdekja është konstatuar në vendngjarje nga ekipi mjekësor. Me urdhër të Prokurorit të Shtetit, trupi është dërguar në Institutin e Mjekësisë Ligjore për obduksion”, ka deklaruar Osmani për RTKlive.
Në raportin 24-orësh të Policisë ishte bërë e ditur se rasti ishte paraqitur nga vëllai i viktimës, i cili kishte gjetur veturën, disa rroba dhe telefonin e tij afër pendës së fshatit.
