Policia e Kosovës për rajonin e Ferizajt ka bërë të ditur se sot rreth orës 13:30, policia në Kaçanik ka pranuar një informatë nga një person në fshatin Doganaj, i cili kishte raportuar se qeni i tij ishte qëlluar me armë zjarri nga i dyshuari R.S, 27 vjeç dhe si pasojë kafsha kishte ngordhur.
“Patrulla policore dhe hetuesit e stacionit të Kaçanikut kanë dalë menjëherë në vendngjarje, ku kanë kryer ekzaminimet e nevojshme dhe kanë konfiskuar tre (3) gëzhoja të pistoletës së përdorur në rast. I dyshuari R.S. është vetëdorëzuar në stacionin policor, ku ka dorëzuar armën e zjarrit (pistoletë) dhe nëntë (9) fishekë”, thuhet në njoftim.
Bëhet e ditur se me vendim të prokurorit të shtetit, ndaj tij janë iniciuar tri vepra penale: Armëmbajtje pa leje; Përdorim i armës së zjarrit, dhe Keqtrajtim i kafshëve.
Policia njofton se pas intervistimit, i dyshuari është liruar në procedurë të rregullt hetimore.
