Shpërthimi i 29 nëntorit të vitit të kaluar u cilësua si akt terroristët me synim të dëmtimit dhe shkatërrimit të infrastrukturës kritike që furnizon gjysmën e territorit të Republikës me ujë. Kjo arterie jetike e furnizimit dhe shfrytëzimi i ujit nga ky liqen, u sulmua me 20 kilogram eksplozivë, duke shkaktuar dëme  në vlerë prej 400 mijë euro. Akuzat për organizimin e këtij akti u drejtuan kah Serbia, ndonëse Shtetet e Bashkuara deklaruan se nuk ka prova që lidhin drejtpërdrejt Beogradin me shpërthimin dhe se është herët për të nxjerrë përfundime, por u konfirmua  se në hetime janë përfshirë edhe agjentë të Byrosë Federale të Hetimeve.

Prokuroria Speciale e Kosovës vazhdon hetimet pa dhënë detaje rreth ecurisë.

Por një vit pas, nuk ka asnjë akuzë të ngritur për këtë rast, pavarësisht se organet gjegjëse kanë arrestuar dhjetëra persona të dyshuar dhe kanë sekuestruar armë dhe eksplozivë.

Megjithatë, vetëm Dragisha dhe Jovan Viçentijeviq janë dërguar në paraburgim.

Njohës të drejtësisë kërkojnë hetim më thellë për këtë akt terrorist.

“Është e domosdoshme që për këtë rast të bëhet një hetim profesional, të ketë dëshmi përtej dyshimit të bazuar, në mënyrë që edhe partnerët tanë ndërkombëtar të binden me aktakuzën e ngritur. E kemi parë që ka pasur reagime të ambasadorit amerikan në Prishtinë dhe Beograd për çështjen e Ibër Lepencit ku në njëfarë mënyrë ka kërkuar që ky rast të trajtohet në mënyrë profesionale në mënyrë që përgjegjësitë të vihen para drejtësisë”, tha për RTK-në Ehat Miftaraj nga Instituti i Kosovës për Drejtësi.

E njohës të sigurisë nënvizojnë se pikërisht aktet si ky duhet të rrisin efikasitetin e masave të sigurisë aty ku infrastruktura është më e ndjeshme dhe më kritike.

“Për t’u siguruar kanali i Ibër Lepencit është shumë vështirë, sepse ne e kemi ligjin për mbrojtjen e infrastrukturës kritike, por duhet të merren masa të tjera operative me qëllim të mbulimit të mizorisë çfarë ndodhi 1 vit pas aktit terrorist në kanalin Ibër Lepenc, në të cilin u tentua nga ekstremistët serb që të pengohet furnizimi me ujë të pijshëm dhe njëkohësisht për ftohjen e sistemit të Termocentralit të Kosovës”, tha Nuredin Ibishi, njohës i çështjeve të sigurisë.

Sulmi terrorist në kanalin e Ibër Lepencit, është sulmi i dytë më i madh që ndodhi në pjesë veriore të Republikës, pas atij në Banjskë, ku Serbia tentoi aneksimin e veriut.