Ata kanë thënë se pacientja M.R. ka qenë në gjendje komatoze (pa vetëdije) për më shumë se tre vite dhe gjatë gjithë kësaj periudhe, kanë thënë në sqarim ata, ka qenë e shtrirë në Kujdes Intensiv Qendror.

“Për tri vite me radhë, pacientja është trajtuar nga mjekët dhe infermierët e kujdesit intensiv, në përputhje të plotë me protokollet mjekësore të aplikueshme për raste të tilla”, ka thënë spitali i Gjakovës në sqarim.

Sipas tyre, denoncuesi nuk është pjesë e familjes së pacientes.

“Deklaratat e tij nuk përputhen me faktet dhe paraqesin tentativë të qëllimshme për të njollosur punën e stafit mjekësor, i cili për tri vite ka ofruar kujdes të pandërprerë, profesional dhe të përgjegjshëm”.

Tutje spitali thotë se edhe pse Kujdesi Intensiv operon me rregulla strikte për vizitorët, për shkak të ndjeshmërisë së rastit janë bërë tolerime të kontrolluara, dhe familjarët kanë qenë të pranishëm në Kujdes Intensiv Qendror gjatë gjithë kohës sa ka jetuar pacientja.

“Nuk është detyrë e jona të hyjmë në çështje të brendshme familjare dhe askush nuk mund të përfitojë duke shpifur apo duke manipuluar opinionin me deklarata të pavërteta”, thuhet në sqarimin e spitalit të Gjakovës rreth rastit.

Ata kanë kërkuar që organet kompetente, Inspektorati Shëndetësor, Policia dhe Prokuroria, ta trajtojnë rastin me seriozitet. “Të mos lejojnë baltosjen e punës së punëtorëve shëndetësorë për interesa personale të askujt”, thuhet në reagimin e spitalit “Isa Grezda” në Gjakovë.

Rasti ka të bëjë me një raportim që një burrë ka raportuar se partnerja e tij, me të cilën ai bashkëjetonte, ka ndërruar jetë. Sipas ankuesit, ekziston dyshimi se ndaj viktimës mund të jetë ushtruar trajtim i pandërgjegjshëm mjekësor.