Këngëtarit të njohur Shpat Kasapi iu dha sot lamtumira e fundit në Tetovë, pas vdekjes së tij të papritur të mërkurën në Itali si pasojë e një sulmi kardiak. Mijëra qytetarë nga gjithë hapësira shqiptare, familjarë, miq, artistë dhe përfaqësues të jetës politike e fetare u mblodhën për t’i bërë nderimet e fundit.
Ceremonia e varrimit u mbajt në varrezat e qytetit të Tetovës, ku kortezhi mortor me arkivolin e mbuluar me flamurin kombëtar kaloi përgjatë sheshit kryesor, nën duartrokitjet dhe lotët e qytetarëve.
Para varrimit, në Qendrën për Kulturë në Tetovë u organizuan homazhe dhe një mbledhje komemorative. Kolegë dhe bashkëpunëtorë të Shpat Kasapit kujtuan me dhimbje momentet e shumta të përbashkëta.
Këngëtarja Big Mama, e prekur nga humbja, tha se me Shpatin kanë ndarë ëndrrat e përbashkëta.
“Sot jam në këtë skenë që për ne të dy nuk ka qenë thjesht skenë. Ka qenë fillimi ynë, vendi ku kemi marrë frymë si fëmijë e si artistë, ku kemi ndarë ëndrra, frikë dhe gëzim”, tha ajo.
Edhe Arif Ziberi, vokalist i grupit “Elita 5”, kujtoi buzëqeshjen e tij karakteristike. “Shpati ka qenë një djalë gjithmonë i buzëqeshur, një djalë që të gjithë e kanë dashur”, tha ai.
Kryetari i Komunës së Tetovës, Bilall Kasami, tha se qyteti ka humbur një artist të madh dhe një njeri të mirë. “Kjo ngjarje na ka pikëlluar të gjithëve, sepse Shpati përfaqësonte vlerat më të mira të komunitetit tonë”.
Në emër të familjes, motra e tij, Jehona Kasapi, mbajti një fjalim emocional.
“Shpat, shpirti i motrës, ti linde me yll në ballë. Ishe njeri me zemër të bardhë, i butë e fisnik. Ndjeje hallet e të tjerëve me empati dhe gëzoheshe me lumturinë e tyre”, tha ajo.
Për nder të këngëtarit, Komuna e Tetovës ka shpallur të hënën ditë zie në gjithë territorin e saj.
