Fundjava e ardhshme pritet ta përmbushë kushtin kryesor të Bashkimit Evropian për heqje të masave, e që është evidentuar edhe në draftin e konkluzioneve për zgjerim.
Më 5 dhjetor, është planifikuar që kryetarët e rinj serbë të komunave të veriut, t’i marrin mandatet. Të gjitha seancat në komunën e Mitrovicës së Veriut, Zveçanit, Leposaviqit e Zubin Potokut janë caktuar në të njëjtën kohë, në orën 11:00, të thirrur nga kryetarët e Listës Serbe.
Tranzicioni i pushteteve në veri të Republikës po shihet si mundësi e largimit të mëtejmë të masave që Bashkimi Evropian i kishte vendosur Kosovës.
Madje edhe në takimin që pritet të mbahet në dhjetor, ministrat evropianë të BE-së do të rikonfirmojnë se heqja e mëtejshme e masave ndaj Kosovës do të ndodhë pas tranzicionit të rregullt të qeverisjes lokale në veri të vendit dhe pas një procesi të vazhdueshëm të deskalimit.
Kjo qëndron në draftin e konkluzave që pritet të miratohen në fund të takimit, derisa një kapitull i veçantë i këtyre konkluzave i kushtohet procesit zgjedhor në vend.
Lidhur me këtë analistet politik ne vend thonë se vendosja e këtyre masave nga BE-ja ndaj Kosovës ka qenë të padrejtë dhe të dëmshme. Por që largimi i tyre sipas njohësve të politikës, do të ishte një mbështetje dhe shtytje drejt rrugës evropiane.
“Largimi i tyre i menjëhershme do të ishte një mbështetje për Kosovën në këtë rrugë. Unë konsiderojë se veriu i Kosovës tashmë është në një situatë komplet tjetër dhe rrethanat të sigurisë atje janë tërësisht ndryshe. Bashkimi Evropian duhet të trajtoj me seriozitet nevojën që të largohen masat që të hapen rrugët procesit integrues të Kosovës sikundër edhe t’i jepet mësimi i duhur që demokracia është e vetmja formë e implementimit të vullnetit të qytetarëve në tërë territorin e Republikës”, tha Dorajet Imeri, analist
Në pjesën veriore të Kosovës, Lista Serbe, fitoi zgjedhjet lokale në katër komuna. Pjesëtarë të Listës serbe nëpër kohë kanë qenë të përfshirë në trazira të vazhdueshme në veri dhe ndikimin që ka presidenti i Serbisë, Aleksandër Vuçiq në këtë subjekt politik është i madh.
Ndaj nga këndvështrimi i analistëve politikë, institucionet e Kosovës do të duhet të kenë kujdes në qasje në mënyrë që BE mos e përdorë si argument për vazhdimin e masave ndaj vendit.
“Qasja destruktive e Listës Serbe është e dritur dhe nuk mund të presim atje asgjë të mirë prej saj. Mirëpo ndikimi i saj negativ duhet të minimizohet dhe të mos shndërrohet në një argument që BE pastaj ta sanksionoi shtetin e Kosovës për shkak të ndonjë qasje jo të duhur. Pra duhet të ketë diplomaci dhe inteligjencë politike të nivelit më të lartë”, tha Artan Muhaxhiri, analist.
Analistët vënë në pah se heqja e plotë e masave, do të forconte pozitën ndërkombëtare të Kosovës në proceset integruese, derisa thonë se me Listën Serbe që rikthehet në udhëheqje lokale dhe me historikun e ndikimit të Beogradit mbi këtë subjekt politik, Kosova përballet me sfidën e gjetjes së një balance mes sundimit të ligjit, stabilitetit në terren dhe ruajtjes së partneritetit me BE-në.
