Gjashtë persona kanë vdekur si pasojë e diagnostikimit me sëmundjen HIV/AIDS, ndërkaq numri total i të prekurve në Kosovë ka arritur numrin 31.
Këto qenë të dhënat për vitin 2025, të cilat u prezantuan në tryezën e organizuar nga Ministria e Shëndetësisë, në bashkëpunim me Institutin Kombëtar të Shëndetësisë Publike të Kosovës me rastin e shënimit të Ditës Botërore kundër AIDS.
Për parandalimin e përhapjes së mëtejshme të kësaj sëmundje, Ministria e Shëndetësisë ka thënë se do të përhap formën pilot të terapisë PrEP.
“Në fillim të vitit 2026, Ministria e Shëndetësisë do të fillojë pilotimin e shpërndarjes së terapisë së PrEP-it (profilaksia para-ekspozimit për HIV) në institucionet e kujdesit parësor shëndetësor, aktivitet ky i cili ka rrjedh nga një nismë për hartimin dhe hulumtimin e PSO-së për shpërndarjen e PREP në institucionet e kujdesit parësor shëndetësor dhe kjo do t’i hap rrugë parandalimit dhe përhapjes së HIV, sidomos në grupet me rrezik të lartë“, tha Merita Vuthaj nga kjo ministri.
Drejtoresha e IKSHPK-së, Ardita Baraku tha se kufizimi i fondeve ka bërë që situata të jetë kritike jo vetëm në Kosovë, por në rrafsh global.
Ndërkaq Luljeta Gashi nga Departamenti i Epidemiologjisë pranë IKSHPK-së, ka thënë se moshat më të prekura janë ato 25-35 vjeç, derisa meshkujt janë më të infektuar me HIV me gjithsej 82%.
