Kryetari i LDK-së, Lumir Abdixhiku, ka reaguar pas sulmeve nga VV-ja. Ai ka thënë se partia e Albin Kurtit po synon të manipulojë me votat e diasporës.
Në një reagim pas kritikave që LDK-ja ka marrë, kryesisht nga Lëvizja Vetëvendosje, Abdixhiku e ka akuzuar LVV-në, se po përpiqet në çdo mënyrë të ndërtojë një sistem të vjedhjes së votave.
“Paskan reaguar i madh e i vogël në sektin e Vetëvendosjes. Natyrisht me mashtrim, pa fakte, me propagandë, siç dinë vetë ata. Mashtrimi u është bërë mendësi sot. E vërteta është se, që nga caktimi i datës së zgjedhjeve e deri më sot, po provohet nga Vetëvendosja në çdo mënyrë të ndërtohet një sistem i manipulimit të votave. I vjedhjes së tyre, për ta thënë thjesht”, ka shkruar Abdixhiku.
Ai ka thënë se votimi në vende ku nuk ka shtet, nuk ka kontroll.
“Pastaj provuan të votojnë në depo mallrash, salla dasmash e restorante; pra, jashtë ambasadave e konsullatave, siç e thotë ligji. Votime në vende ku nuk ka shtet, nuk ka kontroll, nuk ka monitorim. PZAP-i, natyrisht, siç e thotë ligji, nuk e lejoi. Dhe ja ku jemi sot: panik, sulme, ulërima, histeri politike”, ka shkruar Abdixhiku.
Sipas tij, LVV-ja i ka ndërmarrë disa veprime pasi është e pakënaqur me rezultatin e zgjedhjeve lokale.
“Njëherë provuan ta kthejnë sistemin e vjetër të votimit me email – atë ku një militant, para televizorit, mbushte qindra e qindra fletëvotime vetë. Merreni me mend: në Kosovë kalojmë në dhjetëra hapa sigurie para se një fletëvotim të pranohet e të numërohet; këta, të pakënaqur nga rezultati i fundit lokal, donin t’i kthenin kohët e vjetra të votimeve e manipulimeve masive. Rastet e tilla janë ende të deponuara në hetuesi e prokurori. KQZ-ja natyrisht nuk e lejoi. Drejtësia dhe ligji qëndruan”, ka shkruar Abdixhiku.
Sipas tij, diaspora e ka shumë të lehtë të votojë.
“E vërteta është e thjeshtë: mërgata kurrë më lehtë nuk e ka pasur votimin. Përveç se zgjedhjet janë në fundvit, kur secili mund të jetë në atdhe, secili bashkatdhetar që nuk vjen këndej mund të votojë në konsulatë e ambasadë të Republikës – shtetit tonë. Mund të votojnë edhe me postë; secili në emrin e vet, me fletëvotim jo të printuar, por të pranuar nga shteti i vet. E di se do ta bëjnë. LDK-ja po punon çdo ditë me ta. Regjistrohuni dhe ejani e votoni masivisht në Kosovë. Ne jemi të qetë!”, ka shkruar kreu i LDK-së.
