Këshilli Shtetëror i Cilësisë (KSHC) i Agjencia e Kosovës për Akreditim (AKA), ka miratuar Strategjinë e Agjencisë së Kosovës për Akreditim për periudhën 2026–2030.
Dokumenti strategjik përcakton drejtimin e zhvillimit të sistemit të sigurimit të jashtëm të cilësisë në pesë vitet e ardhshme në Republikën e Kosovës, duke reflektuar qartë standardet evropiane, kontekstin e arsimit të lartë në Kosovë dhe vizionin për forcimin e mëtejshëm të besueshmërisë së akreditimit.
Strategjia është e ndërtuar mbi parimet e integritetit, transparencës, profesionalizmit dhe pavarësisë institucionale, të cilat mbeten bazë për gjithë veprimtarinë e AKA-së dhe KSHC-së.
Strategjia 2026–2030 përfshin katër objektiva kryesore zhvillimore: ngritjen e kapaciteteve profesionale dhe etike të AKA-së; avancimin e praktikave të sigurimit të cilësisë përtej përputhshmërisë, drejt një qasjeje të mirëfilltë të përmirësimit të vazhdueshëm; ndërkombëtarizimin e punës së AKA-së dhe forcimin e prezencës së saj në rrjete evropiane e globale; si dhe promovimin e kulturës së cilësisë në institucionet e arsimit të lartë.
Strategjia parasheh rishikimin periodik të standardeve të akreditimit, zhvillimin e procedurave të reja për programet e përbashkëta dhe mikrokredencialet, digjitalizimin e plotë të proceseve të akreditimit, si dhe integrimin progresiv të inteligjencës artificiale në përpunimin e të dhënave dhe hartimin e raporteve.
Pas përkthimit zyrtar dhe dizajnimit të dokumentit, Strategjia 2026–2030 do të publikohet në ueb-faqen e AKA-së deri në fund të javës.
Hartimi i Strategjisë së AKA-së është përkrahur nga Programi SHER, i cili financohet nga Agjencia Austriake për Zhvillim (ADA).
“Në mbledhje 143-të, KSHC shqyrtoi edhe disa pika të rendit të ditës, duke përfshirë edhe një numër kërkesash të institucioneve të arsimit të lartë. Gjithashtu, KSHC trajtoi ankesat e paraqitura nga institucionet të ndryshme dhe shqyrtoi vendimet e Komisionit të Ankesave. U diskutuan aplikimet për ekspertë ndërkombëtarë, rishikimi i aplikimeve për akreditimin e programeve, si dhe njoftime dhe çështje të tjera të rëndësisë operacionale”, njofton Agjencia e Kosovës për Akreditim.
