Steve Witkoff dhe Jared Kushner do të takohen së shpejti me Vladimir Putinin. Agjencia ruse e lajmeve TASS raportoi se Witkoff dhe Kushner ishin takuar më herët gjatë ditës me një delegacion rus, ku përfshihet edhe kryenegociatori i Putinit. Sipas TASS, grupi u mblodh për drekë.
Paralelisht me ngjarjet në Moskë, Volodymyr Zelensky po mban një konferencë për shtyp në Dublin. Zelensky, duke folur nga Irlanda, akuzoi Rusinë për një “fushatë të re dezinformimi” dhe shtoi se Ukraina ishte e përkushtuar për “bashkëpunim konstruktiv” me ekipin e Trump dhe aleatët evropianë, por paralajmëroi gjithashtu se Rusia po i përdorte bisedimet për të dobësuar sanksionet, raporton BBC.
Presidenti rus Vladimir Putin tha se forcat e tij kishin marrë kontrollin e Pokrovskës në rajonin e Donetskut, vetëm një ditë para një takimi kyç me një delegacion amerikan për të diskutuar një marrëveshje të mundshme paqeje për t’i dhënë fund luftës në Ukrainë. Ky takim është planifikuar për sot.
Putin u shfaq i veshur me uniforma ushtarake të hënën në mbrëmje gjatë një vizite në qendrën e komandës dhe në një video të publikuar nga Kremlini, ai vlerësoi atë që e quajti kapjen “e rëndësishme” të qytetit. Pokrovsk ka qenë një qendër kyçe logjistike për ushtrinë ukrainase për vite me radhë, raporton Guardian .Por vetëm disa orë më vonë, Kievi foli hapur, duke kundërshtuar versionin rus të ngjarjeve. Ushtria ukrainase tha të martën se Pokrovsk nuk kishte rënë dhe se forcat e saj ende mbanin pjesën veriore të qytetit. “Luftimi vazhdon, por ne kontrollojmë veriun”, thanë zyrtarët ukrainas, duke argumentuar se pretendimet ruse për marrjen e plotë të qytetit “nuk përputhen me situatën në terren”.
Paraqitja e Putinit, e përgatitur me kujdes, erdhi përpara mbërritjes së një delegacioni amerikan të udhëhequr nga i dërguari special i Donald Trump , Steve Witkoff , i cili mbërriti në Moskë të martën së bashku me dhëndrin e Trump, Jared Kushner . Delegacioni kishte zhvilluar më parë bisedime me zyrtarë ukrainas në Florida rreth një rishikimi të mundshëm të planit të paqes.
Zëdhënësi i Kremlinit, Dmitry Peskov, konfirmoi se Putin do të diskutonte me Witkoff-in “marrëveshjet” e arritura në kontaktet e fundit SHBA-Ukrainë, por theksoi se Rusia nuk do të hiqte dorë nga qëllimet e saj.
