Ministri në detyrë i Kulturës, Rinisë dhe Sportit, Hajrulla Çeku, ka njoftuar për ecurinë e punimeve në Shtëpinë e re të Kulturës në Kishnicë të Graçanicës, një investim i rëndësishëm që synon të forcojë infrastrukturën kulturore në këtë zonë.
Në vizitën e tij në terren, Çeku tha se punimet po zhvillohen sipas planit, ndërsa objekti pritet të shndërrohet së shpejti në një qendër të rëndësishme për jetën kulturore, artistike dhe shoqërore të komunitetit lokal.
Sipas tij, synimi është që çdo zonë dhe çdo komunitet në Kosovë të ketë hapësira dinjitoze ku qytetarët mund të zhvillohen, të krijojnë dhe të marrin pjesë në aktivitete kulturore.
“Qëllimi ynë është i qartë: çdo zonë dhe çdo komunitet të ketë hapësira të denja për kulturë, art dhe aktivitete, ku njerëzit mund të jenë pjesë aktive e jetës kulturore të vendit”, tha ai.
