Presidenti i Shqipërisë, Bajram Begaj, ka uruar sot 113-vjetorin e krijimit të Forcave të Armatosura të Republikës së Shqipërisë (FARSH), duke theksuar rolin thelbësor të tyre në mbrojtjen e vendit dhe sigurinë kolektive.
Në një postim në Facebook, Presidenti Begaj vlerësoi kontributin dhe sakrificat e brezave të efektivëve që, sipas tij, me “atdhedashuri, besnikëri dhe disiplinë” i kanë shërbyer vendit për më shumë se një shekull.
“Sot, në ditën e themelimit të Forcave të Armatosura, nderojmë me respekt kontributin, sakrificat dhe shërbimin e vyer të të gjithë efektivëve të FARSH që me atdhedashuri, besnikëri dhe disiplinë i kanë shërbyer atdheut në këto 113 vite,” shkroi Presidenti.
Ai theksoi se Forcat e Armatosura kanë treguar profesionalizëm dhe përkushtim të vazhdueshëm, duke arritur të jenë “në lartësinë e detyrës për sigurimin e pavarësisë dhe mbrojtjes së vendit”.
Presidenti Begaj vuri në dukje edhe rolin e Shqipërisë në misionet ndërkombëtare, duke u shprehur se pjesëmarrja e FARSH në operacionet e NATO-s, BE-së dhe OKB-së e bën vendin “krenar dhe kontribuues me vlera në sigurinë kolektive”.
“Mirënjohje për çdo efektiv, vajza dhe djem, gra dhe burra të Forcave të Armatosura për shërbimin që i bëjnë atdheut! Gëzuar 113-vjetorin FARSH!”, përmbylli Presidenti Begaj urimin e tij.
Ky përvjetor shënon një moment reflektimi dhe vlerësimi për institucionin ushtarak më të rëndësishëm të vendit dhe rolin që ai ka luajtur në historinë e shtetit shqiptar.
