Galeria Kombëtare e Kosovës QAFA ka njoftuar hapjen e ekspozitës “Shtëpi”, e cila do të prezantohet të premten, më 12 dhjetor, duke sjellë punë të reja nga tre artistët fitues të edicionit të parë të programit të rezidencës në partneritet me Cité internationale des arts në Paris: Kreshnik Arifi, Renea Begolli dhe Lumturie Krasniqi.
Artistët, të cilët punojnë në mediume të ndryshme, bashkohen në një vijë të përbashkët konceptuale: vëmendjen ndaj fragmentimit qoftë vizual, ekologjik apo zanor.
“Veprat e tyre ndjekin proceset e zhvillimit, duke u përqendruar në faza tranzicioni dhe forma të paqëndrueshme. Secila praktikë i afrohet një pragu me një këndvështrim të veçantë: në kompozimet e Kreshnik Arifit, gjuha e trashëguar shpërbëhet në tinguj të pastrukturuar; në fjalorin e materialeve të Renea Begollit, organikja rrëshqet në sintetike; ndërsa në veprën e Lumturie Krasniqit, format ekzistojnë mes pranisë dhe zhdukjes”, njofton GAK.
