Kremlini kërcënoi hapur Bashkimin Evropian të enjten, pasi Brukseli zbuloi planin e tij më ambicioz financiar që nga fillimi i luftës, një propozim për të përdorur pothuajse 80 miliardë paund asete të ngrira ruse për të financuar Ukrainën.
Dmitry Medvedev tha se një veprim i tillë do të ishte një provokim i drejtpërdrejtë dhe arsye e mjaftueshme për luftë.
“Nëse Bashkimi Evropian i çmendur ende përpiqet të vjedhë asetet ruse të ngrira në Belgjikë nën maskën e një lloj ‘kredie për dëmshpërblime’, Rusia mund ta konsiderojë këtë hap si një casus belli (arsye për luftë, op.ed.), me të gjitha pasojat për Brukselin dhe anëtarët individualë të BE-së”, tha ai në një deklaratë.
Deklarata e tij vjen një ditë pasi Komisioni Europian njoftoi një propozim që do të shihte BE-në të mbulonte dy të tretat e nevojave financiare të Ukrainës, gati 90 miliardë euro, deri në vitin 2027 përmes një modeli huadhënieje kundrejt aseteve të ngrira ruse ose konfiskimit të tyre të plotë.
Presidentja e Komisionit, Ursula von der Leyen, theksoi se Ukraina ka nevojë urgjente për mbështetje të qëndrueshme për të vazhduar financimin e ushtrisë dhe funksioneve themelore shtetërore.”Ne propozojmë të mbulojmë dy të tretat e nevojave financiare të Ukrainës për dy vitet e ardhshme. Kjo është 90 miliardë euro”, tha ajo. “Dhe meqenëse presioni është e vetmja gjuhë që Kremlini e kupton, ne mund ta rrisim atë edhe më shumë.”Sipas Brukselit, propozimi do ta bënte praktikisht të pamundur rikuperimin e më shumë se 180 miliardë paundëve të aseteve shtetërore dhe private ruse që janë ngrirë në bankat dhe shtëpitë e kliringut evropianë që nga viti 2022, një masë e paprecedentë dhe goditja më e drejtpërdrejtë ndaj kapitalit rus deri më tani.
