Presidenti rus Vladimir Putin ka komentuar publikisht për herë të parë takimin me delegacionin amerikan, duke deklaruar se takimi ishte i dobishëm.
Duke folur për India Today në prag të vizitës së tij në Indi, Putin iu referua negociatave me anëtarët e delegacionit amerikan, Jared Kushner dhe Steve Witkoff, dhe e përshkroi takimin e tyre si të nevojshëm.“Takimi zgjati pesë orë, por ishte i nevojshëm. Mori shumë kohë sepse ishte e nevojshme të shqyrtohej çdo pikë e propozimit të paqes”, tha Putin.
Ai tha gjithashtu se çdo pikë e marrëveshjes është analizuar në detaje.
“Shtetet e Bashkuara të Amerikës kanë marrë përsipër misionin e vështirë të zgjidhjes së konfliktit në Ukrainë. Propozimi i tyre bazohet në negociatat që patëm në samitin e Alaskës. Çdo fjali është shqyrtuar në detaje. Ne kemi katër dokumente që kemi hartuar nga plani i paqes që përmbajnë 27 pika”, shpjegoi presidenti rus.
Kujtojmë se më herët, edhe Presidenti i SHBA-së, Donald Trump, komentoi rezultatet e takimit në Moskë, duke thënë se Putini donte paqe.
“Çfarë do të dalë nga ai takim, nuk mund t’ju them, sepse duhen dy veta për të kërcyer tango”, tha Trump.
