Asociacioni i Gazetarëve të Kosovës (AGK), në partneritet me JTI, organizoi sot ceremoninë e parë të ndarjes së Çmimit për Raportimin më të Mirë në Ekonomi 2025.
Në thirrjen e hapur nga 19 deri më 30 nëntor u pranuan gjithsej 22 aplikime, të cilat u vlerësuan nga juria e përbërë nga Agon Sinanaj, Mentor Buzhala dhe Ardita Dushi.
Ngjarja u hap me fjalën e kryetarit të Bordit të AGK-së, Xhemajl Rexha, i cili theksoi rëndësinë e gazetarisë ekonomike për transparencën publike, llogaridhënien dhe forcimin e demokracisë.
Ajo u pasua nga fjala e Ardita Dushit të JTI-së, e cila vuri në në pah rëndësinë e partneritetit me AGK-në dhe mbështetjes së storjeve që nxisin përgjegjësi institucionale.
Përfaqësuesi i jurisë, Agon Sinanaj, ndau përvojat e vlerësimit, duke vlerësuar profesionalizmin e lartë të aplikimeve.
Në këtë edicion të parë u shpallën fituesit e çmimeve për raportimin më të mirë ekonomik. Vendi i parë u nda mes dy gazetarëve: Alberta Hashani nga Betimi për Drejtësi, me storjen “Tenderi i dyshimtë i kamionëve, u kërkuan me urgjencë për t’u mbajtur në parking”, një hulumtim që zbulon keqpërdorime të mundshme në një tender prej 400 mijë eurosh dhe Egzon Dahsyla nga Kallxo.com, me storjen “Kurdisja e tenderit: Audioincizime se si kryeshefi i KRU ‘Gjakova’ u përfshi në negociata për një tender të ndërmarrjes”, e cila dokumenton manipulimin e një tenderi publik dhe pasojat që pasuan publikimin.
Çmimet për vendet e para u ndanë nga Sazan Alija, Drejtor Rajonal i JTI-së.
Vendi i dytë iu nda Sanie Jusufit nga Koha.net për storjen “Shumëfishimi i vlerës së subvencioneve nuk ul importet”, që analizon pse rritja e subvencioneve bujqësore nuk ka ndikuar në uljen e importeve, ndërsa çmimi u dorëzua nga Getoarbë Mulliqi, drejtoreshë ekzekutive e AGK-së.
Vendi i tretë shkoi për gazetaren Arjeta Shabani nga Reporteri.net me shkrimin “Kosova, nga ‘insider tip’ drejt destinacionit të ëndërruar”, që sjell fokusin te zhvillimi i turizmit malor dhe ndikimi i tij në ekonominë lokale. Çmimi iu dorëzua nga anëtari i jurisë, Mentor Buzhala.
Ceremonia shënoi fillimin e një tradite të re për vlerësimin e gazetarisë ekonomike në Kosovë, duke inkurajuar raportimet profesionale, hulumtuese dhe të orientuara drejt interesit publik.
