Kryetari i Lidhjes Demokratike të Kosovës, Lumir Abdixhiku, priti sot në takim Ambasadorin e Francës në Kosovë, Olivier Guérot, ku biseduan mbi zhvillimet e fundit politike në vend dhe qëndrimet e LDK-së për këto procese, me fokus të veçantë në zgjedhjet e 28 dhjetorit.
Gjatë takimit, Abdixhiku e informoi ambasadorin për përgatitjet intensive të LDK-së për zgjedhjet nacionale, duke theksuar mobilizimin e plotë të strukturave të partisë në të gjithë vendin. Ai njoftoi se partia është në fazën përfundimtare të përgatitjeve, duke finalizuar listën e deputetëve, e cila përbëhet nga figura të provuara profesionale, përfaqësues të rinj dhe të integruar, me një vizion të qartë për zhvillimin ekonomik, forcimin e sundimit të ligjit dhe modernizimin e vendit.
“Kemi përgatitur një ekip të përgjegjshëm dhe të përkushtuar, që reflekton seriozitet, përvojë dhe punë të palodhur. Lista jonë synon të sigurojë institucione stabile dhe një qeverisje zhvillimore në shërbim të qytetarëve”, ka theksuar Abdixhiku, njofton Lidhja Demokratike e Kosovës
Ai shprehu gjithashtu mirënjohjen për mbështetjen e vazhdueshme të Francës ndaj Kosovës në proceset shtetformuese dhe zhvillimore, duke theksuar se kjo mbështetje mbetet thelbësore për avancimin e aspiratave të vendit drejt zhvillimit, stabilitetit dhe integrimit të plotë evropian.
