Një degë e gjigantit amerikan të tregtisë elektronike, Amazon, u ka paguar rreth 180 milionë euro autoriteteve tatimore italiane dhe ka hequr një sistem gjurmimi të dërgesave me qëllim që të sigurojë pezullimin e një hetimi mbi mashtrimin e mundshëm tatimor dhe shfrytëzimin e punëtorëve, thanë sot burime të njohura me çështjen.
Në korrik 2024, policia financiare italiane sekuestroi rreth 121 milionë euro nga dega italiane e Amazon si masë paraprake, pas një hetimi nga prokurori i shtetit për mashtrim të mundshëm tatimor dhe shfrytëzim të punëtorëve. Zyra e prokurorit të Milanos dyshonte se Amazon po nënkontraktonte në mënyrë të paligjshme detyrat e dorëzimit për të minimizuar kostot e punës dhe për të paguar më pak taksa.
Prokurorët e Milanos kanë hapur më shumë se një duzinë hetimesh të ngjashme, duke dyshuar se DHL, GLS, Uber, Lidl, BRT, Geodis, Esselunga, Securitalia, UPS, GS, grupi Carrefour dhe GXO po përdorin gjithashtu praktika të tilla. Kështu, në fillim të korrikut të vitit të kaluar, ata sekuestruan 84 milionë euro nga GXO, sipas një raporti nga agjencia italiane e lajmeve ANSA.
Shuma totale e paguar është më shumë se një miliard euro.
Urdhri për sekuestrimin e 121 milionë eurove nga Amazon deklaroi se kompania nuk kishte paguar kontributet e TVSH-së, pensioneve dhe shëndetit. Autoritetet italiane përmendën në një deklaratë “mashtrim kompleks tatimor” përmes “një mekanizmi të paligjshëm faturimi për punë ‘ligjërisht joekzistente’, në lidhje me kontratat me nënkontraktorët”.
Mekanizmi po shkakton humbje të mëdha në buxhetin italian, me shfrytëzimin e vazhdueshëm të punëtorëve në dobi të Amazon Italia Transport, thanë ata në një deklaratë. Amazon tani u ka paguar rreth 180 milionë euro autoriteteve tatimore italiane, duke u bashkuar me një grup prej rreth tridhjetë kompanish që kanë arritur marrëveshje në dy vitet e fundit për të mbyllur hetime të ngjashme.
Shuma totale e paguar është më shumë se 1 miliard euro, sipas një dokumenti gjyqësor të parë nga Reuters. “Ne ua kemi shpjeguar qëndrimin tonë autoriteteve kompetente, të cilat kanë njohur standardet e larta të modelit tonë të bashkëpunimit me partnerët e shpërndarjes”, tha Amazon në një deklaratë.
