Oda Ekonomike e Kosovës ka shprehur shqetësimin për deklarimet e ministres në detyrë, Artane Rizvanolli, për, siç thotë OEK, “sot para mediave na etiketoi padrejtësisht si ‘akter politik opozitar’ dhe pretendoi se OEK ka dekurajuar bizneset të aplikojnë për skema grantësh”.
Sipas Odës Ekonomike, këto pretendime janë të pabazuara, të dëmshme dhe të papranueshme për një institucion që prej dekadash ka bashkëpunuar me çdo qeveri, pa dallim.
“OEK vazhdimisht i ka inkurajuar bizneset të aplikojnë në të gjitha skemat mbështetëse, përfshirë edhe grantet, duke i parë ato si mekanizma të rëndësishëm për zhvillimin ekonomik të vendit”, thekson OEK.
Tutje OEK thotë se çdo deklarim i kundërt nuk qëndron dhe përpiqet të njollosë punën dhe kontributin tonë shumëvjeçar në shërbim të komunitetit të biznesit.
“OEK i kërkon znj. Rizvanolli që deri të hënën, më 08.12.2025, të paraqesë prova të qarta dhe të verifikueshme mbi pretendimet e bëra publikisht”, nënvizon OEK.
Po ashtu thuhet se në mungesë të këtyre provave, OEK do të iniciojë procedurat ligjore për shpifje dhe dëmtim të reputacionit të institucionit.
“Gjithashtu, rikujtojmë se ish-ministrja duhet të mbajë përgjegjësi për dëmet e shkaktuara bizneseve nga mënyra e njëanshme dhe e papërgatitur e futjes së tyre në tregun e lirë të energjisë—proces që u ka krijuar vështirësi serioze financiare dhe operacionale shumë ndërmarrjeve vendore”, thekson tutje OEK.
Oda Ekonomike e Kosovës thotë se mbetet e përkushtuar të punojë me profesionalizëm, pavarësi dhe transparencë, duke mbrojtur interesat e bizneseve dhe të ekonomisë së vendit.
“Ne do të vazhdojmë ta kryejmë këtë mision me integritet, ashtu siç presin anëtarët tanë dhe opinioni publik”.
