Lëvizja Vetëvendosje ka njoftuar se është dëmtuar shtylla dhe pllaka e flamurit kombëtar pranë varrit të aktivistit Astrit Dehari në Prizren.
Në një reagim të publikuar në rrjetet sociale, ky subjekt politik ka falënderuar Policinë e Kosovës për reagimin e shpejtë dhe ka bërë të ditur se po pret rezultatet e hetimeve lidhur me rrethanat e këtij incidenti.
“Me keqardhje kemi marrë lajmin se është dëmtuar shtylla dhe pllaka e flamurit kombëtar pranë varrit të aktivistit tonë, Astrit Dehari. Falënderojmë të gjitha njësitë e Policisë së Kosovës për reagimin e shpejtë, ndërkaq jemi në pritje të hetimeve që njësitë e specializuara të Policisë së Kosovës po zhvillojnë në drejtim të zbardhjes së shkaqeve apo shkaktarëve të këtij dëmtimi”, thuhet në reagimin e LVV-së.
Astrit Dehari ka ndërruar jetë në nëntor të vitit 2015 në Qendrën e Paraburgimit në Prizren. Ai po mbahej në paraburgim lidhur me sulmin ndaj ndërtesës së Kuvendit të Kosovës, gjatë protestave kundër marrëveshjes për Asociacionin e komunave me shumicë serbe.
